Adonde stan?

Adonde stan las bordas de l riu
adonde stendi brancos lhinos
a la berdura de ls suonhos?
Adonde stá l´auga
a correr fresca,
tranquila,
arrastrando fuolhas
dun outonho dourado?
Adonde stás riu
que tan triste lhiebas tou correr!?
Adonde stan las selombras
i las calores para te poder buer?
Adonde stan las merendas
serbidas an toalhas albas?
Fazerie pormessas,
ouraçones i,
até nobenas fazerie,
para que las nubres
te beisássen,
t´anchíssen
i you pudísse al menos
ser barco de papel,
an ti...