Apuis de ua cumbersa que tube un die destes cul nuosso amigo Tortulhas, resolbi screbir un "Crime Eisemplar", anspirado pula obra de Max Aub, de que Alfredo falou eiqui i eiqui.
Treminei l café, bubi un pouco de la auga que tenie nel copo i abri un lhibro.
- Que stás a ler?
- Uas cuontas de un outor mirandés.
- Un outor de Mirandela? Cumo aqueilha porsora zambergonhada que apareciu na Playboy? Fazírun mui bien an çpedi-la, andaba a corrumper las mentes de ls ninos cun fotografies eiróticas. Ai, que fotografies! Nun gusteste de las ber? You até me babei!
- Este outor nun ye de Mirandela, naciu ne l cunceilho de Miranda de l Douro.
- Ah, stá bien. Stás a gustar de l lhibro?
- Nun sei, inda nun me deixeste ler mais de dues linas.
- Deixa-me ler un cachico. Mas que ye esto? Se el ye pertués, porque ye que scribe an spanhol?
- Nun scribe an spanhol, scribe an mirandés.
- I esso que ye?
- Ye ua lhéngua.
- A sério? Pensaba que an Pertual, solo se falaba pertués.
- Nun. Fala-se tamien mirandés.
- Que giro!
La palabra «giro» foi la gota de auga. Parti-le l copo na cabeça i cortei-le la garganta culs bidros.
2 comentários:
Biba, Fir, buonas tardes,
Formidable!!
Formidable, mas nó "giro", quando nó nun te chégan ls copos.;)
Esta scapou-se-le a Max Aub, mas stou cierto que haberie de tener proua de la poner antre las cuontas del.
Abraço arrochado
Oubrigado pulas tues palabras, Tortulhas. La cumbersa que tubimos outro die anspirou esta pequeinha brincadeira.
Abraço arrochado tamien para ti,
Fir
Enviar um comentário