16/08/10
Debuolbo-me...
Debuolbo-me
A la ourige de l miu ser
Barro amassado
Státua por modelar
Poema adiado
Palabras por rimar.
Debuolbo-me...
Debuolbo-me
You mesma
A la raiç
Que me sigure
I fuorte me prenda.
Debuolbo-me...
Debulbo-me a la secura
Para tornar a naçer
Na frincha dun fraguedo
A l´abexedo
Para que puoda ser
Ua flor
Nua mistura de cardo i bioleta
Singela
Fuorte
De cielo la quelor.
Nun pido
Ponto para quelóquio
Rede para eiquelibrismo
Cabalho para touriada
Prémios
Palmas...
Nada!!
Chega-me
Manos que me caléçan
Uolhos que me béban
Coraçones que me ámen
Almas que me cumpléten
Debuolbo-me...
Debuolbo-me
Barro
Fraga
Seda
Auga
Racho de madeira
Debuolbo-me...
Anteira!
Subscrever:
Enviar feedback (Atom)
Sem comentários:
Enviar um comentário