PENSARES

.

PORQUEI TANTA RÁBIA OU SERÁ AMBEIJA?

Nunca chegarei a antender porque ténen ls homes que star debedidos antre squierda i dreita i muito menos porque ls partidos tomórun cunta de las cuncéncias de alguns. Nacimos para sermos lhibres i para tenermos l lhibre-arbitrio, para starmos lhemitados solo por las leis de la naturaleza, mas porque ateimamos an poner apeias uns als outros? Porquei, tanto defendemos a quien nun mos dou mandato pal fazer i nun respeitamos a quien nun pensa cumo nós? Porquei, tanta rábia ou será ambeija de ls outros?
Tenemos l dreito de creticar, dízen alguns, mas quien somos nós para tener moral para creticar ls outros? Tenemos si, l dreito de an abstrato dezir l que pensamos, mas nunca creticar ou fazer juízos subre ua determinada pessona, mesmo que seia cunsiderada un creminal, porque nun sabemos las rezones i até se essa pessona nun ye melhor que nós.
Quando screbimos eiqui subre qualquiera assunto nota-se miedo nas pessonas, miedo de dar la sue oupenion, miedo de que se pense que stan dun ou doutro lhado, quando debemos star de todos i de nanhun. Se un home se cunsidera mulher ou ua mulher home, quien somos nós para dezir que stan arrados? Queremos ser abogados sien mandato i padres sien haber recebido l sacramento de la Orde. Inda nun bos destes cunta que quando somos houmildes i praticamos la toleráncia somos mais felizes? Yá pensestes ne l que serie l mundo se tubisse solo ua quelor, se nun houbisse çfréncias, se nun tubissemos porque lhutar?
Nun mateis la cabeça a pensar nun mundo purfeito, nin gasteis einergies a querer un mundo a la buossa eimage, porque diç la Bíblia que Dius fizo assi l home i saliu cumo l bemos. Bamos por todos a fazer por que todo ande melhor, para haber menos rábia, mais paç, bamos a - bibir, deixar bibir i, se possible, ajudar a bibir(Amadeu Ferreira) -.