28/01/08

Aranhones



L aranhon



Ye scassa la giente que ama ou gusta d’aranhones. Puode dezir-se que son cousas bibas mal amadas. Ye berdade, mas tamien c'uns mais que cun outros, que quando ls bemos quedamos cun miedo, dan-mos arrepelos i quedamos cun piel de pita. L pouco que sei ye que s’algun mal mos fázen ye solo an sue própia çfénsia cumo bichicos pequerricos que son dan-mos ua mordesquina i apuis sal burmelhon. Desso nun ls podemos cundanar muito, ye bien l modo de todo l que hai na natureza i ye pequeinho.
You puodo nun ls amar mas nun zgusto deilhes, até cuido que son mius amigos. Se nun mirai: quando chego a la casa bielha, an mie tierra, an todas las paredes i squinas s’ancóntran berdadeiras obras d’arte feitas por estes artesanos, son tan bien feitas que méten ambeija als houmanos. Dende le quedar agradecido pul regalo.
Dua cousa you tengo la certeza, son stramuntanos i trabalhadores. Aranheiras feitas de todos ls tamanhos i feitius, quien s’astribe a fazer melhor? Fazírun las aranheiras cumo sparrielhas, a las moscas i moscos que por ende ándan, se calha fazendo mais mal que ls aranhones. Un serbício útele. Cumo paga, nós ls houmanos agarramos ne l bardeiro i çtruimos todo aquel trabalho. Anton nun son esses probes cuitados que ende bíben na casa bielha l anho anteiro? You ye que sou l stranho, you ye que nun bibo alhá, solo bou de besita, son eilhes que stan d’atalaia. I, cumo ende móran, son eilhes que ténen dreitos subre l que fazer.
Siempre que tengo tiempo, quedo-me grandes cachos a mirá-los i a sues obras, bien d’acerca i beio que son obras atinadas, trabálhan ls filos de l’aranheira cumo la ourdideira trabalha la ourdidura. Quedo cun mauga de pouco saber subre estes bichicos. Alguns deilhes ténen cuorpos stranhos mas guapos. Debe de ser un mundo marabilhoso esse de ls aranhones, que solo ls specialistas, que studórun, conhécen, i que la maiorie nun antende. Sou un çfensor deilhes, i ls retratos que amostro son bien la proba rial de que merécen assossego. Retratei este aranhon cumo quije, passou pulas mies manos i nun me fizo mal nanhun.


Aranhon custruindo la sue aranheira


Ua aranheira


Sem comentários: