TOADAS OUTONHALES

Amerosamente l friu arrepiçou la fuolha
i nua airaçada se fizo ala.
An toadas outonhales bibiu la lhibardade plena.

Éran tan moços i garridos
ls passos de dança  an que saracoteaba!
Sin alarde deixou-se agarrar
até sentir cuordas de biolino ne l fondo de l ser.

Por manos debinas tocada, cumo bibraba!

Deixou-se amboubecer
ne l ancanto de las rebuoltas de l riu. Eilha yá l'amaba!

Maçcalhou las bordas de beleza
até se deixar romper de prazer.

Eilha ye natureza.


Teresa Almeida Subtil

.

Teresa Almeida Subtil