Miu pai

― An 58, houbo eileiçones an Pertual. You tenie 19 anhos i cumo quaije todos ls sapateiros que trabalhában na oufecina de tiu Eiduardo Aleixo l  que queriemos ye que Humberto Delgado ganhasse las eileiçones i sabiemos que staba an cundiçones de las ganhar. Yá na altura muitos de nós queriemos que las cousas mudássen senó nun tardarie a que mos scapássemos todos pa la França. I fui por acaso l que acunteciu cumo tu sabes. Ora ne ls dies antes de las eileiçones, houbo até quien chegasse a ir a colar cartazes a fabor de Humberto Delgado an Sendin mas tamien houbo quien, delantre de todos, chegou a ls ir a rasgar. Quieres que te diga quien ?

― Quiero !

[....]

― Un die, poucos anhos depuis, fui cumbidado a ir a un casamento. An Sendin. Naquel tiempo, alguns quaije morrien de fame mas la boda fui cumo se questuma dezir “a la grande i a la francesa”! Nun faltaba nada! Habie fartura de todo tanto para quemer cumo para beber!  Tamien s’assentórun a ua mesa uns quantos padres (Éran mais de binte!). Puis, l que eilhes nun comírun i bebírun! You cula fame que tenie tamien fiç eigual i tamien outros cumo you mas la defrença ye que nós teniemos pouco mais que la piel anriba de ls uossos porque passábamos l tiempo todo a trabalhar (na oufecina i tamien ne l campo cumo a mi m'acuntecie, a mi i a outros!) anquanto eilhes, esses padres todos,  nun tenien cara de giente que passa muita fame. Acumparado cun nós, andában mas ye bien gordos i bien lhabados! Bien pouco tiempo debien de passar cumo nós passábamos nun só a trabalhar l die todo na oufecina cumo tamien a segar i a cabar porque ne l campo tamien faziemos falta.

Bés, cumo era la bida dantes ! Dius querga que nunca mais seia assi !