Esse genial cumpatriota

 

Yá que aqui stamos, por que nun poner tamien neste sítio, mais retratos de Jean Dieuzaide sabendo que yá dous fúrun aqui eiditados zde que este sítio eisiste antre ls quales l redadeiro eiditado  nestes dies ?

Tengo na realidade alguas rezones de l fazer...

- Esse retratista francés era oureginairo de la mesma region adonde you moro, aqui ne l Sudoeste de la França. Tenie 82 anhos quando se morriu, an Toulouse percisamente, bai a fazer pal anho que ben 10 anhos. Naciu por cunseguinte an 1921, “dans l’entre-deux guerres” cumo se questuma dezir an francés, quier dezir: durante esse período de solo 21 anhos que houbo antre la purmeira i la segunda guerra mundial.

- Tenie 23 anhos quando, an 1944, na altura de la Lhibertaçon, chegou a realizar ls purmeiros retratos que se tornórun célébres ne ls quales aparece tamien l general de Gaulle quando passou por Toulouse, an Setembro desse mesmo anho.

- Quien melhor que Jean Dieuzaide, nesta region tan próssima de la Spanha, podie, depuis de la 2da guerra mundial, ir cula sue máquina a retratar tamien ls habitantes de ls dous países de la Península Eibérica: Spanha mas tamien Pertual? Este retrato de Dalí realizado por el tamien quedou na stória. Talbeç yá l cunhecíssedes mas dezi-me se tamien se sabiedes quien l habie sacado. A partir de agora nunca mais bos podereis squecer!

Dali, Cadaqués, Catalunha, 1953

Mas nun ye solo por bies desse quadro que pessonalmente sinto muita admiraçon por esse genial cumpatriota (Depuis de mais de 40 anhos ye normal que you me sinta tamien francesa agora). Ye, sien dúbeda ninhua, por bies de todos  ls retratos que mos trouxo, a partir de ls anhos 50, de las biaiges que fizo nun solo an Spanha cumo tamien i subretodo an Pertual. Retratos todos eilhes a preto i branco dua antensidade tal (an special ne l oulhar i tamien ne ls géstios de las pessonas que el retratou naquel tiempo) que ye defícele, ampossible mesmo, un quedar andiferente ou cumo se nada fusse.

“Era assi ls paíç de ls que te criórun i adonde tu naciste”, penso you a cada beç que beio esses sfergantes de bidas passadas... passadas mas inda tan persentes! Inda nun hai muito que todo esso acunteciu. Ye cumo se inda fusse onte!

 Agosto 1944, Lhibertaçon de Toulouse

 Granada, 1951, Cigana, Sacro Monte

Sebilha, 1951, Torre del Oro

Vieira de Leiria, 1954

Braga, 1954

Son eimages fuortes todas estas (antre muitas outras tamien de grande balor) sacadas ne ls dous países de la Península Eibérica inda dominados na altura por ditaduras cun populaçones oubregadas l mais de las bezes a lhutar diariamente pula sue subrebibéncia. L que hai que dezir anton: que todo esso yá passou i que nun hai que pensar solo ne l passado ? Talbeç, mas essas eimages quédan i ne l miu caso sei que nunca s’apagarán. 

Jean Dieuzaide, tamien el retratado, tan grande ou quaije afinal cumo un Robert Doisneau ou un Henri Cartier-Bresson; an 1965, an Nuoba Iorque, delantre de la státua de la Lhiberdade que fui oufrecida als Stados Ounidos pula França, an 1886.

I an 1966, tamien nós deixábamos l rinconico que habie sido l nuosso zde giraçones i giraçones i íbamos pa la França...