Ne l alto de la duna branca
La bida pousa i çcansa,
Miu pensamiento na scuna
Nabegando na lhembrança.
L bento que bai passando
I beio l sol bocejando
Me chama pal momento
I momento, se bai scundendo,
Sien priessa, suabe, bien lhento.
Las quelores ban zbotando
Apagando mais un die,
I la nuite bai-se spalhando
Trazendo de buolta la magie.
L poeta acende las streilhas
I anfeita l palco nocturno,
Alegres duendes benen a be-las
Até un bicho soturno.
Culas fadas a spreitar
L sunrriso de la lhua chena,
Que calece, i alhmina l mar.
Ne l aire hai murmúrios de preces
De crentes, anfermos, amantes,
Ban antregá-las als santos,
Que ls anjos, seres andantes.
Lhagrimas, sunrrisos, spantos,
L ancanto dels narcisos,
L miedo dels zancantos,
La çaranda dels andecisos,
La profecie dels ansanos,
La calçada dels scluídos,
La anjúria dels profanos,
La angústia dels ouprimidos,
La bergonha dels zonrados,
La bigília dels perseguidos,
L riso dels dessimulados,
L zprezo dels abjetos, perdidos
La fé que nun zanima,
La mano que squeciu l afeto,
L berso que perdiu la rima.
La boç de la nuite amostra l squeleto
Muitos segredos al bento
Planeian na fantasie.
Anquanto miles pensamientos
Nas trebas l silêncio begia,
La muorte se confunde al sunho,
L mistério se refugie,
La bida sperta pa l sunho.
Nun mito de muita alegrie.
José António Esteves
Lar de San Jesé Bumioso
4 comentários:
ls buossos bersos yá staban a tardar para las froles anfeitar.
Salude i saludos,
antonho
Buonos dies tiu Jesé
-Parabienes por mais estes bersos, cumo diç Antonho, yá stában a tardar, l froles yá sentie la falta deilhes.
-Muito friu ende, na Bila, outra cousa nun era de sperar, porqui tamien mas até ne l friu essas tierras son bien defrentres deiqui.
Un abraço arrochado
Faustino
Buonos Dies tamien para bós. Agora yá nun puode ser quando quiero mas si quando me deixan.
Puis friu si fai mas nada que nun se aguante.
Esses tius de las telebisones cumo quiera que nunca fúran culas bacas ó culas canhonas.
Abraços pals dous.
José António Esteves
Enviar um comentário