La Fiesta de ls Sabores Mirandeses

Sabores Mirandeses ye l títalo que stá ne ls papeles de la purpaganda de l Festibal de Gastronomie i Artesanato.

Gustos,… i que gustos!... Bonda un mirar pa ls papeles i yá queda sien modo de sigurar l´augadilha que na boca mos medra i anteima an caer, beiço abaixo. Quando antramos ne l Pabelhon Multiusos bén-mos lhougo l oulor a çurça i a canela, a folar i a pan dóndio benido de l forno artesanal de Malhadas.

Calece-se-mos l´alma até solo de ber ls puiales cargadicos de cousas que zde siempre mos aquestumemos de ber colgados de las baras yá negras de fumo, de tanto anho a sigurar l fumeiro.
Quien cumo you,, que por muitas rezones nun puodan meter las manos ne ls barrenhones de ls chichos, nó porque nun sáben ó nun séian capazes, mas porque yá nun ténen quien apuis le faga l lhumico para que se cure l fumeiro, ende puoden mercar de todo, cun muito sítio para scolher l mais de sou agrado, mais burmeilho de pomiento ó mais çquelorado.
Las tabafeias míran relhamposas, puis que se nó relhamposas, yá me dezie mie abó, assópran l lhume an beç de anchuquecer la cinza cun las pingas de untadura. Las chouriças, uas yá coradas para quemer an crudo, outras dóndias para assar nas brasas.; ls chouriços caros cumo l lhume, ls botielhos, las bocha i las morcielhas, l chabiano outra beç cheno de proua, el que fui çquecido tanto anho, todo se puode mercar apuis de chitar l puial que mais mos agradar. S´adrega un porbar an todo quanto ye sítio, podemos salir d´alhá almorçados cun las rodaxicas i l pan que mos son puostos delantre, para porbar.

Çufinos afumados, peçpiernos i patas, oureilhas i queixos, costelhales secos ançurçados ne ls barrenhones de ls botielhos, míran para nós i mos lhieban a ls nuossos tiempos de garotos. Quien nun se l lhembrará de l gusto dun cacho de pan untado cun un cacho de queixo ó de barbada frie, guardados na mosqueira, quando beniemos almorçar, para apuis tornarmos pa la scola?!

Apuis dá gusto mirar la doçarie: sodos, súplicas, cabacas, bolha doce, licores bariados i alguns de preduçon de jobenes que assi bíncen la falta d´ampregos, giente cun cursos ounibersitários que arrefúcen las mangas de la jaqueta i se bótan palantre para que l que bemos apergonar por todos ls sítios nun ls atinja que nien chiçpa an freixo…,i assí ban custruindo sues bidas an pequeinhas aldés, loinje de las grandes cidades.

L artesanato caratelístico de la region alhá stá i outro que tamien giente nuoba bai criando cumo por eisemplo monas, jogos para ninos, almofadas chenas de grano que apuis de calcidas ne l micro-ondas ajúdan a atamar ls delores de ls uossos.

Ls soticos stan primorosamiente anfeitadas cun colchas, tapetes, toalhas todo guapíssemo i ls potes de fierro que de tan sfregados parécen de stanho i caldeiras a parecéren speilhos, dan a la feira de sabores un ar de antigo, quando a fin de cuontas todo ye feito cun modos modernas.

Quatro dies de fiesta, adonde las gaitas de foles ban botando sous sonidos i dan l ritmo als palos de ls dançadores. Las nuites ténen sido animadas cun la música de scelentes grupos, la maiorie deiqui mas tamien de porende afuora cun músicas de ritmos çfrentes de la nuossa música tradecional.

Stá de parabienes la Tierra de Miranda i la nuossa lhéngua que siempre fumos falando cun amigos que ancuntremos i que tamien na fiesta tubo un spácio para cumbersas an mirandés.

Stá de parabienes la ourganizaçon i stá l pobo mirandés, aquel pobo lhuitador cumo siempre fui, para bencir l friu i la fame cun sues manos lhaboriosas.