Nun fui perciso muitos anhos para me dar cuonta de l mal que fazie.
Mas, hai siempre un mas, nesse tiempo quando garoto nun tenie antendimiento bastante para saber l que quedaba bien ou mal, até fuorça de las circuntáncias ir-me a “Chés”, segneficaba tener mais algua cousica para quemer. Bien you sabie que caçar Chés cun rateiras feitas a mano ou de l cuntrabando de Mobeiros cuntribue pa l zarranjo de la natureza, bien you sabie que esses probes paixaricos fázien mais bien que mal, bien you pensaba que até quemien centenas de moscos prestando un bun cerbíçio a la houmanidade.
Agora que passórun anhos i anhos ben-me a la lhembráncia esses atos de barbaridade, las bezes que lhougo a la purmanhana bien cedico me botaba a monte i por ancuostas i balhes íba armando las rateiras (costielhas) cun formigas d’alas a pie de todo al que fusse galho seco i trampo.
Cuitadicos nun le deixaba salida possible, apuis de passar la nuite cun fame era ber-los caier sien duolo nien piedade, sien tener feito mal a naide. Quantos deilhes fraquitos, puis assopraba-le la prumaige por ambaixo na quilha i solo se bien uossos. Cumoquiera l mais deilhes habien bolado dies i dies, çtáncias anfenitas, criado cul maior de ls trabalhos, i alhá staba you, sabedor de todas las manhas a sentencial-le la muorte para rapar la pouca chicha.
Ah probes paixaricos cumo érades anfelizes, sien tener quien bos acudisse, qual “Bonatória” qual quei, quien fazie las leis era you, era you l todo poderoso, ponie las rateiras quando i adonde querie, i bós paixaricos pequerruxicos nun tenien çafa, porque ls grandes esses nun quemien moscos, cuntinában cumo siempre a cantar de galho.
L mundo nun demudou muito, só que ls caçados son outros i ls modos tamien, las rateiras cumo dantes alguas son feitas eiqui i a mano i outras bénen de fuora. Tamien ls caçados l mais deilhes stan fraquitos, trabalhórun que se fartórun mas peçque nun fai mal, mesmo que la raça steia an bias de stinçon.
Las barbaridades cuntínan, porque cada beç hai mais bardinos
4 comentários:
"Caímos que nien Chés", ye berdade i cun alas de anjicos andefesos...
Gustei de las eimages de las rateiras que tamien you ponie ambaixo de las freixeiras de ls cerrados i, sobretodo, gustei de la parte final, que mos fai ir al títalo.
Beisicos,
Delaide
Quando se zbentraban ls formigueiro pa sacar las formigas d'alas, si eramos bien trabessos...
Chés son Chascos?
Buonos dies
Ah Adelaide, ...stamos caindo cun alas d'anjicos andefesos... gustou-me muita desta spresson que ye bien cumpleta.
L mundo stá zoumanizado, quien dirie, puis la geraçon que mos antecediu i inda la nuossa apostou fuorte i trabalhou tanto para ser melhor, mas hai liciones que nun mos ántran na cabeça
Caro Antonho, you cuido que Chés nun son Chascos, mas cunfesso que pouco sei, ches peçque son paixaricos d'arribaçon, ban-se pa ls países calientes, Chasco cumo diç Moisés Pires (Pequeinho Bocabulairo) "chasco chascon, ne l'antruoido yá pon, ne la Páscoa yá ten borrifon".
Quien sabe se por ende ben alguien a dezirmos (comentar) cousas mais claras, porque se calha you baralhei todo.
Un abraço
Buonas nuites a todos ls chés esses na mie tierra cuido que éran ls storlhones. A esses si quel gustaba la formiga. seia cumo seia nós bien gustabamos de ls calar.
Até diç l porbérbio popular cai que nin un torlhon.
Abraços
José. A. Esteves
Enviar um comentário