Açagar l tiempo

a

L berano ten destas cousas, un cuida star todo bien i nun sfregante l sol queda amouchado, negro que nien breu, relhampeija cumo demónios i caí auga a potes.

Nun hai silbeiras nien touças que mos bálhan quando stamos ne l termo, todo bira un anfierno i lhebamos cua buona anchapuçadela mesmo que seiamos afilhados de buona giente. Queda-la la suorte de estas truniadas tráieren siempre muita calor i pouco friu nun ye sisma deilhas quedaren-se por muito tiempo. Bénen de mala cara déixan ls galatones nas aradas i caminos, ancúbren las bordas de las rues de lhodo que habie bien pouco era puolo, ls fenos, cardos, folharascas, trampos i menudas báilan la dança de ls boubos nas cachoneiras de la torriente rigueiros abaixo.
Malditas, nun sei, tamien apadrinalas de buonas quien l puode fazer, quier-se auga porque todo stá seco i muorto pula torreira que fai ne ls redadeiros dies. L’auga fuonte de bida ye mais que percisa pa l termo i pa la boca, mas benindo deste modo ye l mais de las bezes mal benida.
Da cuonta de todo


I l berano ten destas cousas, un stá nua cumbersa bien animada i amerosa cula sue quadrilha, assientodos an buolta dua mesa sorbendo uns trasgos para matar la sede i nun sfregante la cumbersa ampeça a afilar para un só lhado i sien dar por eilha ye cumo se fusse ua truniada, çpéijan-se palabras a mais, oupeniones que até eiqui naide las coincie i ideias que nien fáien muito sentido. Nun fáien galatones nas amisades i camaradaige, nien anlhódan naide, mas que ye ua stragaçon ye. La cumbersa fuonte d’antendimiento, quando queda salagre i sfuirada, muitas bezes fuora de tiempo nun ye bien benida.


L berano ten destas cousas, na calentura i ferbor de ls acuntecimientos açagamos l tiempo, quantas bezes bien necáiro para outras cousas. Falo pur mi, que nun ye quando trabalho mais, mesmo sabendo que ye quando me sobra muito, amalandro-me dun modo que nun gusto, antrego-me a cumbersas que nun son las mais dreitas.

Mas l berano ten destas cousas.