La nuossa cumbersa ye la mesma todos ls dies…
Anton cumo se passou hoije l die? Cumo ls outros, que mais ha-de dar.
I nun hai nobidades?
Nó, nun se morriu naide ye l qu'antressa.
Ye assi todos ls dies la cumbersa cun miu pai al telifone. La solidon ye eimensa. La falta de mie Mai, aliada a la zertificaçon de l'aldé, faç cun que la bida de miu Pai seia de grande solidon. Réstan solo trés ó quatro casales moços que dan un pouco de quelorido a l'aldé i bida als poucos bielhos qu'inda atéiman an zafiar l tiempo, anque l mais deilhes ande pula casa de ls uitenta i nobenta anhos. Lharga bida la daquelhas gientes, que tanto trabalhórun i que l tiempo, por bezes, tan mal tratou. Ye a esses que tantas bezes oubimos dezir: - ua sardina? Baia…, era debedida por trés. Siempre me ampressionou essa repuosta!
Mas hoije, la nuossa cumbersa mudou d'assunto… Anton Pai, cumo ye que corriu hoije l Deimingo?
Bien, hoije tubimos fiesta!
Fiesta? La de San Grabito? Nun sei porquei mas zde qu'era pequeinha que me lhembro d'oubir essa spresson, pido çculpa al Santo mas nunca soube quien era.
Si, fazírun eiqui l jogo de la malha, bieno giente de to l lhado, hoije, nun mos faltou cumpanha. Ls mardomos de la fiesta de l Outonho nun ténen cumo arranjar denheiro pa la fiesta, an honra de la Nuossa Senhora de la Ancarnaçon i, cun estes jogos, téntan arranjar mais un dinheirico para podéren fazer ua fiesta dina a la sue Santa Padroneira. Ls prémios tamien ajúdan i ancentíban ls jogadores a l'anscriçon, un cordeiro pa l 1º lhugar, un persunto pa l 2º lhugar i uas perdizes pa l 3º i, subretodo , manténen ua tradiçon qu'als poucos se bai acabando, ls jogos tradicionales que tanto mos ajudórun a adbertir i a passar ls poucos tiempos lhibres de la nuossa mocidade. Al fin de l die l resultado fui positibo, todos stában mais felizes. Pa ls mais bielhos fui un die adbertido i cheno de recordaçones de l passado, cheno de giente que dou bida i quelor a la pequeinha aldé. Pa ls mardomos fui mais un pouco de denheiro garantido pa la sue fiesta.
Yá que ls nuossos gobernantes nada fázen pa l zambolbimento de l nuosso Praino, al menos hai pessonas que téntan, d'algun modo, alegrar i pintar las sues aldés de quelores defrentes para que ls nuosso eidosos cuntínen a ber las quelores de la cinta de la bielha de la bida…
Sem comentários:
Enviar um comentário