Cruç cobradaNua de las mies, poucas, salidas algo más loinge de l cortiço, cantusei-me antre carreirones i ancruzelhadas, senaras, lhagonas, silbeirones, scobales, peinhas, cereijales, chafarizes, paredes de cerrados, ourrietas de yerba seca, sítios de ribeiros an eimbiernos más molhados … cachicos de mundo tan acerca que anté un s’anraiba quando mos damos cuonta de l tiempo passado cume cousas pasmadas a mirar de boca abierta para un bidrico que pon la giente a bulhir i a falar. Modernices que usa quien quier, quien puode i a quien le dá la gana. Afinal diç que stamos nua democracie, dizen, que al que a mi me dá fé cume bicho de algun antendimiento nunca outro regime bi. Sentir uns calafrius de l que benie de trás si senti mas a la parte esse aire de cenceinho nien para custipar dou, nada más ampalpei.
Buono, mas la cumbersa nun era esta la que you querie tener cun bós hoije, nó que l assunto son caminadas pul Praino i nada de politiquices, por esso traio-bos eiqui un de ls maiores atentados que alguien, por çcoincimiento, por çcuido ou pul que seia, fizo ou deixou que fazíssen: cobrar, ou deixar cobrar ua cruç i deixar ls cachos (un, que ls outros nun ls çcubri) azimbrados no meio duas yerbas arrastrado por ua máquina de amanhar caminos, nun será l maior feito de quien debe cuidar l património. La cruç stá assinalada nas cartas melitares 1/25 000 de 1950 na ancruzelhada antre la Lhagona Grande i la Lhagona Pequeinha de Malhadas i essa cruç (ou l que sobra deilha) ten uas seinhas de marron - cruzes - eiguales a las seinhas de la Cruç de Braço Cobrado no termo de Sendin adreitos a Ourrós.
Que dreito tenemos a çtruir l que outros cuidórun durante seclos ou miles d’anhos para que hoije pudíramos ouserbar? Que salbaijes mos fazimos an nome de la modernidade?
Á tiu persidente de Malhadas ... ou de Miranda! se me stais a oubir preguntai a quien partiu la cruç de la Trindade cume la punírun outra béç de pie.
Á tiu persidente de Malhadas ... ou de Miranda! se me stais a oubir preguntai a quien partiu la cruç de la Trindade cume la punírun outra béç de pie.
5 comentários:
Buonas nuites Abelhon,
Apoio todo l que dizes. Mas sabes l que ye l pior? Ye que las pessonas nun se dan de cuonta de que esso son crimes contra l (nuosso)património. Anton l que tenemos de fazer ye splicar, dar sentido a las cousas i este blogue para muito puode serbir. Hai todo un trabalho de eiducaçon de nós mesmos que tenemos de fazer: nun hai que andar a saber de menumentos loinge, que ls tenemos a la puorta, i a saber de causas fuora de nós que esta ye bien grande i bien cuncreta.
Talbeç steia na hora de ourganizar caminadas pul Praino a mostrar a las pessonas l nuosso património i a splicá-lo cumo debe de ser. Que me dizes?
Talbeç assi, als poucos, se cunsiga algo.
Un abraço i bien haias por falares destas cousas
Amadeu
An respeito a isso l'outro die (bon ya hai mas d'un mes !) fui a la penha de la pisocada dal mouro, an Samartino.
Pus sabes, aqueilhas graburas cun pucicas staban scundidas cun palha ! Si cun palha !
Bai alha a saber porquei que fui...
Buonos dies
You aprepongo l die: 27 de l Natal.
Por eisemplo ua caminada de Fuonte Aldé (de la fuonte de la aldé) a Prado Gatón, passando na Trindade (aquel sítio a mi fai-me ir anté l cromeleque de Almendes, este birado a Ébora i la Trindade birada a Miranda), na cruç i fuonte mourisca de la ancruzelhada de l camino Picuote/Prado Gatón.
La matáncia de l cochino puode ser antes ou aspuis de la caminada. Para espetar la faca yá tenemos i fachucos tamien ls amanhamos.
Esta ye ua eideia que saliu agora i cume tal inda nun amadurou, por esso apanhamos cuntribuiçones de todo mundo.
Abraços
Ne l die 28 antegrado nel GEADA 2008 (L Purmeiro Festibal de Cultura Tradecional de las Tierras de Miranda - 26 a 28) bai-se fazer un passeio cun besitas a dues eigreijas, san martino e pruoba.
Muita cousa se bai puder ber..
Aparecei..
Buones dies Abelhon,
You passei muitas bezes al pie dessa cruç, quando iba de l cerrado de la cerbeira a chegar las bacas a lauga a la lhagona grande i apuis iba para casa pul lhado de bal de boieiros. Ye decierto un atantado grande l que fazírun, cumo ten sido la çtruiçon de puontes antigas sustituídas por puontes de cimiento an quaijeque todas las aldés. Mas tenemos de ser todos a splicar que estas cousas son çtemunhos que ls nuossos antepassados mos deixórun i que todos tenemos oubrigaçon de mantener i se possible melhorar. Deixo eiqui un apelo al persidente de la junta de Malhadas, amigo Jesé Agusto, que beia esse atentado i fale cun quien alhargou i apreinou l camino, yá que l partideiro inda nun ye antigo i talbeç çcubra quien fizo tal feito.
La eideia de la caminada parece-me buona i cumo dizes ye amadurece-la i apuis botamo-nos a eilha.
Enviar um comentário