Pequeinha crónica dua “Tertúlia”

La Casa de “Trás-os-Montes e Alto Douro” (CTMAD) an Lisboa atrabeç de la sue direcion i demais uorganos diretibos stá de parabienes pula pormoçon, ne l passado die 14  d’Outubre dua “tertúlia” cula temática de Amadeu Ferreira.

Hai que dar ls parabienes a esta anstituiçon associatiba i cultural, porque nun se squece ls sous cunterráneos, chama a eilha einiciatibas culturales cumo esta, ajuntando giente que stá deseosa de cumbibir i partelhar l que le bai andrento culs sous stimados amigos.

I quando se trata dua persona cumo l nuosso stimado porsor, mestre, ambestigador, scritor, poeta Amadeu Ferreira, de la taluda obra que mos deixou, de ls sous eisemplos houmanista, de sue antrega a to l mundo zde ls que stában a pie del dando siempre las manos anté aqueilhes que stában mais apartados, ne l campo de las lhetras, culas obras screbidas, publicadas, traduzidas, cuontas i poemas, cumo home de l ansino que ancaminou i ajudou tantos studantes, ne l ansino de la lhéngua mirandesa, dibulgando, pormobendo i sparbando cumo patrimonho lhénguistico i cultural, sue lhéngua querida, porque fui la purmeira, fui la de ls sous i sues gientes, ansinou a lher i screbir giente de to las eidades i recantos, motibando, acunselhando i ancaminado todos aqueilhes cun quien cumbibie i que amostrában ganas de saber i daprender.

I ye eiqui i nesto que la CTMAD stubo bien, pois cun esta einiciatiba permitiu que aquel ajuntouro quemungasse todo dun sprito que le bai n’alma, oubir i falar dun amigo que nun stando antre nós stá siempre cun nós. La “Tertúlia” tubo bários momientos altos, mas tengo que çtacar l momento anque la Dr. Teresa Martins Marques (outora de l lhibro  - Fio das Lembranças – Biografia  de Amadeu Ferreira) botou palabra i falou del cumo home, cumpanheiro, camarada, amigo, de la sue grandura an todo l que fazie i querie. Fui ua fala rica, sclarecedora, porque nien todos stabamos i stamos purparados para antender ne l taludo ouniberso dua persona tan rica i a quien debemos tanto, sien oubir quien sabe. Tamien ls momientos de lheituras, l quelóquio i ls teçtemunho fúrun ricos.

 Tubo este ancuntro muitas birtudes, ua deilha staba bien strilhada na cara de ls que ende stában, la quemunhon de la amisade, de l amor que tenemos al Dr. Amadeu Ferreira i sous feitos.

Fai-mos bien a l’alma estes cachicos, peçque ende sentimos la calor de sou cuorpo, l ferbor de la sangre que le corrie nas benas. La sue boç, ls sous cunseilhos. Cuido que cun todos, cumigo acuntece, siempre que leio, falo, amberso del i de sue obra quedo cun mais ganas de nun parar, a la fin fui siempre l quel me dixo i dezie a to l mundo.

“l camino fai-se caminando”

Amadeu Ferreira merece que steia siempre persente, quien puode i fur capaç, atrabeç destas einiciatibas ou outras que l faga ye un deber nuosso, ye ua oubrigaçon, mesmo sabendo que nunca seremos capazes de pagar todo l que mos dou.

Bien háiades pula einiciatiba, bien háiades a todos ls persentes, Amadeu Ferreira i la sue obra fui, ye i siempre será un marco de referéncia na nuossa bida i Stória.

Faustino Antão