Mirai, morriu-se la nina!

Mirai, morriu-se la nina!
Apuis tou tiu fazie pouco... Mirai, morriu-se la nina!
Stabas tan malica i cerreste ls uolhos. Si pensei que t´habies morrido i, ampecei a chorar.
Souturdie, pedi ua burra i fui-me a Miranda para te ber l doutor.
A naide mais l´amportaba se stabas malica ou nó, se bibies ou nó, se s´habie de ir a Miranda cuntigo. Tue madrina até dezie, que bien era que Dius te lhebasse d´anjico.
Apuis l doutor nun staba alhá i tube que sperar muito tiempo que l doutor Raposo chegasse i só bulbimos a casa yá mui de nuite.
Tenies parende arrimado a dous anhos. Tenies anginas mas agora you beio que staries cun algua pulmonia tamien. Dórun-te ua anjeçon de penicilina i apuis ampeceste a quedar melhor.

Anhos apuis na mie eirreberença de adolecente, muita beç oubi este zabafo: Ui, stebiste tan malica, bien podie haber-te deixado morrer! Apuis que fui mai, bi que isso nun era possible...
Agora, siempre a falar de las cousas d´antiempos, mie mai cunta-me estas cousas, nó decierto para spiar culpas, tengo la certeza que, por nun séren sentidos, eilha nunca se sentiu culpada cun tales zabafos mas só se sentie ancapaç  cun la fuorça braba de la filha. Ye ua necidade de falar...

Cousas de mai...