05/01/14

LS REIS MAGOS (ua cuonta)
 



 Fui ua beç trés tius mui ricos que bibien eili pa ls lhados de l Ouriente. 
 Chamában-se Gaspar, Belchior i Baltazar.

 L tiu Gaspar era tan rico que siempre que chobie a la crona de la torre de l sou castielho i miraba al redror nun era capaç d'abistar las marras de l termo de sues tierras, que quedában a la tiesta de las de l sou bezino Belchior. Neilhas sembraba tamanhas senaras, tenie tantos castanheiros, sobreiros, binhas, oulibeiras, maçaneiras, laranjeiras que ls sous screbinadores nunca éran capazes de fazer la cuntaige cierta, a modos del saber la fertuna quanto tenie. 

 Belchior era dunho dua quinta miu grande, que lhebaba dias a trote d'acabalho ne l sou camelo para dar la buolt a i bolber adonde partiu. Dentro de las bedaçones tenie tierras de cultibo, minas d'ouro, de fierro i carbon. Bilas i aldés, culs sotos, fraugas, teares, lhagares, molinos, fundiçones, carpintaries. Muitos oubreiros a scabar nas minas, carpinteiros para fazer ls carros de bestas, ferreiros para fazer reilhas, charruas, ferraduras, çadones, facas, gadanhas, foices, potes. Albardeiros para fazer las albardas, çapateiros para fazer las correias de las bestas, tecedeiras para tecer i fazer mantas i alforjas.
 L tiu Baltazar, que siempre tubo anclinaçon pa la cria, era duonho de tantos i taludos ganados de canhonas, de cabras, de camelos que siempre que chegában ls pastores para le dezir ls númaros el dezie-les:  
 Bós nun bos anganhestes?
 Son assi tantos miles de canhonas, de cabras, de camelos?
 Crecírun tanto zde limpassado?
 Yá nun tengo giente para tomar cunta de tamanha riqueza.
  Quando un die s'ajuntórun nua de la muitas almuorçaradas adonde nun faltaba nada. Puis de las tierras de Gaspar benie l pan, l bino, l azeite, de las oufecinas de Belchior, benien las facas, ls garfos, ls potes pa cozinar ls canhonos, ls cabritos que benien de ls ganados de Baltazar.
  Apuis de queméren a la farta botában-se ls trés a la cumbersa.
  Cumo homes ricos que éran, quaije siempre falában de l que íba a ser l feturo, de l que ls sous adbinadores (bruxos) le dezien, i ls cunseilhos de ls tius sábios de sue cunfiança.
  Fui nua destas cumbersas que un deilhes cuntou que yá se falaba por ende que staba para nacer un Rei. Nun sabien adonde, nien quando,  s'era filho de giente probe ou benerie a hardar algua fertuna.
 Anton terminórun ls trés ambiar por ende afuora homes a percurar las nuobas, eilhes querien ser ls purmeiros a saber i tamien oumenagiar-lo. Éran ricos, éran reis, porquei tamien nun habien de ser eilhes cunselheiros de l nino-rei que staba pa nacer.
 Algun tiempo apuis assi acunteciu, chegórun ls biaijantes cula nuoba, dezindo que si naciu un nino a caras a Belén que se querien fazer la besita tenien que sperar pula seinha que era ua streilha.
 Na nuite que apareciu la streilha que ls biaijantes, ls adbinadores, ls cunselheiros andicórun, nun perdírun tiempo.
 Recumendórun ls criados para purparar ls melhores camelos, las albardas, i muitas mantas, que purparassen alforjas, cantaras para lhebar auga, barrilhas pa l miel i ansenso, serrones para lhebar muito ouro.
A toda la priessa, abandunórun l acunchego de sous reinos, ampeçórun la maior jornada de sues bidas, seguírun la streilha atrabessando zertos,montes i plainuras, mobidos pula fé.
 
 Teçtemunhas cuntórun que çpuis de doze dies i doze nuites de camino, ancuntrórun ua cabanha, adonde staba un Nino. Les trés quedórun marabilhados cul que bien, l Nino arrodeado de pai i mai, i muitos anjos, ambuolto por un claron de lhuç. Nun l dubidórun un anstantico que fusse, que tenien delantre deilhes l Nino-Jasus, l Rei salbador de l Mundo.

 Ls trés reis de l Ouriente lhougo cun muitas mesuras a sous pies de zinolhos quedórun, adorórun-lo, oufrecindo-le  todo quanto lhebában.
 Este Nino que naciu sien l acunchego de castielhos nien la riqueza de reinos tenie agora l'adoraçon de ls reis magos.
 Era la spráncia de ls pobres.



(Faustino Antão)

Sem comentários: