Porque ye que até agora nunca aderi al Facebook ?

 

 

Inda nun me squeci i talbeç nunca me squeça. Pedírun-me a mi i a outros colegas  porsores (I neste caso, quien pediu i ourganizou fui la direcçon  de la scuola, un liceu de l ansino público cumo hai milhares, an França) para acumpanhar uas quantas turmas de moços i moças cun eidade antre ls 15 i ls 17 anhos (acho que la maiorie éran alunos de l décimo anho) até ua sala de reunion que pertencie al município ("la mairie", an francés) adonde habien anstalado todo l eiquipamiento neçairo para que dous polícias fardados (mas sien armas) pudíssen splicar a todos esses jobes i als porsores, a partir d’eisemplos i de casos,  ls riscos potenciales ligados a l’outelizaçon  descuntrolada de l’Anternete. I fui nessa altura (bai a fazer uns quatro anhos) que me lhembro de haber oubido dezir pula purmeira beç  tantas cousas (durante hora i meia ou até dues horas…) subre l Facebook : i neste caso preciso,   subre ls peligros que cada un  puode correr (i nun só ls jobes que son giralmente tamien ls mais bulnerables) quando nun son tomadas alguas precauçones. I fui tamien amportante, na altura,  que nun fússemos só nós, ls porsores, a tentar splicar ls riscos possibles (L que sabemos mais an relaçon als jobes, nós ls adultos, hoije an die,  yá que l Facebook cuntinua a ser para muitos ua ferramienta inda nuoba ou até çcunhecida mas tamien puls bistos mais cumplexa que l que un pensa muitas bezes ?). Fui amportante por acaso i sien dúbeda ningua dua grande eificácia que tubíssen sido esses dous  "gendarmes" dua brigada specializada an assuntos ligados a l’outelizaçon abusiba de l’ Anternete cul oubjetibo de falar de casos reales mas tamien de sensibilizar ls jobes i las pessonas an giral.

I l que acunteciu ye que tamien you quedei ampressionada nesse die i cula total cumbicçon que tamien ye l papel de la Scuola i de l'Eiducaçon Nacional de fazer esse trabalho de anformaçon i de prebençon. Porque, cumo siempre, « Un home anformado bal dous ! » : un home, ua mulhier, bielho ou nuobo, bós ou tamien you, Amigos Leitores. 

Mais  recentemiente, aparciu tamien un filme que dou que falar que mostraba tamien lados problemáticos relacionados cun l FB (I cun estas dues einiciais , ye deficele  nun pensar nessa outra  cousa criada tamien ne ls Stados Ounidos da América que se chama l FBI… !)

Mas tamien  me stou a lhembrar de l que l me respundiu un die un colega miu, porsor de Stória, francés, quando, faç un anho ou nien sequiera, inda cheguei a preguntar : Mas afinal, bal la pena ou nó un abrir ua cuonta ne l Facebook ? (a pensar por eisemplo an todos ls anternautas, cumpatriotas mius, que durante anhos stubírun i por bezes inda stan persentes an sites cumo este an lhéngua mirandesa mas que ampeçórun cul tiempo a ir para outros cielos i a aderir i a acraditar pula cierta cada beç mais ne l Facebook…  ). Bai anton Christophe (miu colega,  mas houbo inda outros noutras oucasiones) :

« Cuidado ! dixo-me el, i inda acrecentou, se bien me lhembro… l fulano que criou essa rede, esse tal Zuckerberg  ye un fulano peligroso ! »

Mas tamien,  inda nun faç dous dies, cun Annie que tamien ye francesa i ansina pertués cumo you i que me dixo : « L Facebook ? Desso nun quiero ! »

Quier dezir que a nun ser ls colegas mais nuobos que stan quaije todos registrados mas que téntan assi i todo cuntrolar l’outelizaçon que fázen de l Facebook, penso que la grande maiorie (cumo acuntece cun grande parte de la populaçon francesa a partir dua cierta eidade) se chegórun a spurmentar registrar-se un die  acabórun  muitos por cancelar la cuonta i neste caso talbeç esso tenga acuntecido tamien mais an ciertos países que noutros. Digo esto porque tamien tengo l'ampresson que ls porsores an Pertual siempre dórun mais amportáncia al Facebook que nós an França por eisemplo.

Ye por esso que nun beio outra maneira senó sperar que l tiempo tamien mos ajude: a cumprender las rezones eisatas de uns (i tamien de ciertos países) quereren  ser puls bistos mais prudentes que outros, talbeç por acharen que ye neçairo tener tamien alguas eisigéncias… tendo an cuonta la defesa i la proteçon de la pribacidade de cada un, un dreito que uns dízen nun star suficientemente garantido ou protegido para quien aceita registrar-se ne l Facebook; mas tamien  problemas de andependéncia i de soberanie de ls Stados que yá ampeçórun a ser apuntados i tamien denunciados…

Só me resta anton ua soluçon para saber se quiero ou nó anscreber-me you tamien un die ne l Facebook  al cuntrairo de l que pénsan muitos de ls mius colegas franceses:  indo por anquanto oubserbando, oubindo, bendo, aqui i eilhi, antrando an ciertas prieças de casa quando ls porpietairos aceitan de deixar la puorta ou las jinelas abiertas, l que nun ye siempre l caso…

Até ber! Até you talbeç tamien me deixar cumbencer. Mas quando ? Esso ye que nun sei dezir.