Nien siempre l que parece ye!

Hai situaçones de bida que mos sácan risadas. Se mos der la risa de cousas sérias, melhor seremos capazes de las repassar i puodan ser fuontes d’einergie, aprendizage i ansinamentos. I, cumo mos fai falta rir de cousas sérias i nun tirar cunclusones percepitadas!

Hoije a la nuitica, cumo quaije todos ls dies, la mie agarrou-me arrimado a la staçon de camboios apuis de mais un die de trabalho. Antrei andrento l carro, dei-le un beisico i ampeça a rir-se cumo ua boubica…you a mirá-la i eilha cuntina…. l riso apega-se i… you ampeço a rir me tamien…, ye cousa buona rir…alhá assossegámos i diç-me:

- Scuita esta, scuita…i cuntina a rir-se sien adelantrar fusse l que fusse..

- Bah, bota-le alhá…

- A meia tarde chamórun-me para que fuosse ber la casa de banho de ls rapazes i solo querie que tu bísses, las paredes todas chenicas de merda a modos de riscos. Ua pessona nun sabe se há-de rir ó chorar mas rir ye siempre melhor…fui-me classe a classe a fazer l sermon: stube a ber las cámeras de filmar i yá bi quien fui, mas you quiero que andrento la tarde, l culpado bá tener cumigo, pida çculpa i lhimpe todo para mos quedarmos assi.

Passado un pouco, achéga-se a mi un i diç-me: «nun era you, nun era you, era outro cun l peinado eigual al miu». Nun ye fácel mantener l sério mas alhá me aguantei i dixo-le: agora quiero que agarres un panho i lhimpes todo. «Mas nun fui you, nun fui you, nun ye justo...»

Agarrou l panho i lhimpou todo.

A fin de tarde, ua nina achega-se a mi i diç-me: «quien fizo aqueilho nun fui Juan Pedro mas Manel Carbalho.»

Chamei Manel Carbalho i cun boç serena i firme: achas cierto deixares castigar tou colega, sabendo que nun tenie sido el? Gustabas que te fazíssen l mesmo a ti? Bais pedir çculpa i pormetes nunca mais tornar a mintir i a fazer l que fazíste. L nino pediu çculpa, pormeteu nun repetir i nunca mais mintir.

Apuis chamei Juan Pedro, dixo-le tener bisto melhor nas cámeras de filmar i que tenie bisto nun tener sido el i pedie-le çculpa por lo tener culpado. Nun repente salta para miu cuolho todo cuntento i dá-me un abraço bien arrochado.

Nien siempre l que parece ye!