Relhembrar (houmenaige, cuido que ye mais que merecida)

Un die srebi assi: (um dia escrevi assim:)

Tiu Abel-Custrutor d’arte

 Quien passar pula rue de Belharino an Zenízio puode inda hoije ancuntrar-lo antretenido cun algun tranco.

 Eili ne l sou cabanhal agarrado a ua machadica, anchó ou praina, tiu Abel dá fuorma, amanha ou streforma qualquiera cacho de madeira. Ye assi que bai tocando la bida nestes redadeiros anhos de las oito centenas que cunta, ye assi cul sou bagar i manos anterjeitadas, antendimiento i anteligéncia, dedicaçon, criatebidade i antrega a las sues obras.

 Tiu Abel, home de buns tratos cun to l mundo, fazedor d’amigos, bien falante i antendedor de al que se quier, chega a tamanha eidade cua lhucideç ambejable, siempre ancantando i dando cunseilhos als familiares, parientes, bezinos i amigos, nunca cerra la puorta a naide nien nega seia l quien seia. Bun ambersador i sabedor, aculhiu siempre todos aqueilhes que lo percurában querendo nuobas que para muitos stában squecidas i que a el le quedórun fruito dua spriéncia i dun saber daprendido al lhargo de ls anhos de bida nesta tierra.

 Hoije acupa l tiempo que le sobra, d’amanhar la huorta i outros afazeres, ne l artesanato. Tubo dantes bariadas atebidades, sendo la lhaboura la percipal, chegando a passar puls çtinos de la freguesia.

 Mas quedou-le l bechico de l artesanato de madeiras i a esso s’antrega porque nun puode star parado.

 Eiqui a dies quando stube cun el, scabacaba nun palo que me dixo que dende iba a salir un jugo. Cumo doutros yá habien salido cholas, baquitas, bitelicos, carros de bacas i setas, paixaricos, castanhuolas, candenas, colheres, garfos, eigreijas i santicos, i tantos que se le perde la cuonta.

 Pieças guapas i bien feitas, pieças que retrátan las atebidades, lhidas  i las cousas, ls animales i la natureza, pieças que son teçtemunhos de l die a die de las gientes desta region, sous saberes i sue cultura spargidos ne l tiempo.

 Todas eilhas purfeitas, cúntan cuontas, çpértan mimórias, ancántan quien las bei, nuobos i bielhos, dalhá i de fuora i nadie queda andefrente a tamanho sabedorie i eimaginaçon de l lhucitador que las fai.

 Ye, sien dúbedas un berdadeiro eisemplo d’ampeinho para nós, quedámos assi cula certeza que estas pieças quedáran cumo teçtemunhos pa las geraçones feturas.

 Son ls artesanos de madeiras a la par de ls ferreiros, cesteiros, albardeiros, tecedeiras, alfaiates que dán las maiores upas para que las tradiçones nun se pérdan para siempre.

(Screbi esto i publiquei hai ua dúzia d'anhos datrás, quijo l çtino quel cuntinasse cun nós até trasdonte, agora que Dius l chamou pa la redadeira morada que çcanse an paç, porque you del nunca me squecerei, lhembrarei-me deste home cumo amigo, cumpanheiro, pariente , que até trasdonte me dou cunseilhos, i naide  eirá acupar l sou lhugar, porque l sou lhugar ye único)
Faustino Antão