La hardáncia dun home buono (A herança (legado) de um homem bom)

Tiu Abel deixou-mos un legado, houmano, cultural i artístico cumo poucos l fazírun

Al lhargo de la sue bida, puis deixou-mos cun 92 anhos d’eidade i até ls redadeiros dies, fui un home cunsciente que mantubo cuntatos cun todos nós.

La hardança (legado) que mos deixa ne l campo houmano ye dun balor eilebado, era un eisemplo ne l bien atender i recebir, siempre recebiu to l mundo de braços abiertos, sien se negar a botar ua upa a quienquiera, culas palabras ciertas siempre dou buns cunseilhos i saludos sanos, pula sabedorie porque era home spriente, acunhou i bibiu muito de las famílias mais achegadas assi cumo de todo un stórico de la quemunidade an giral. Percurado por muita giente porque sabien que tenie conhecimento i saber, daprendido al lhargo de ls anhos, era un cunselheiro an quaije todo, pa ls de l sou tiempo i un lhibro abierto pa las nuobas geraçones. Sien nunca se negar a botar ua mano, muitas i muitas fúrun las bezes que  fui chamado para ajuizar questones amportantes drento de la sociadade cebil i squecidas pula quemunidade.

Deixou un legado artístico, atrabeç de las obras que custruiu an arrochos, palos ou trancos de madeira. Siempre anteligentemente, botaba ne l que fazie sabedorie i stória, cun ampeinho an fazer bien i perfeito, l sou artesanato era ua arte, deixou un mundo de rejistros de las atebidades i oufícios, de las cousas dun bibir de l sou pobo. Custruiu obras de to las áreas, de l’arte religiosa até ls oubjetos que l quemun de ls mortales fazie uso ne l die a die, ua semba, mas an todas eilhas hai seinhas i modos de passar ua mensaige pa l’eiternidade. La mensaige de que para alhá de la muorte tamien hai bida, este modo de rejistar las tradiçones i questume dun pobo ye sabedorie de mestre.

Ua quemunidade cumo la de Zenízio, fai-se de muitas cousas i por muita giente, mas naide tenga dúbedas, fai-se mais cuas cousas de que cun outras. Fai-se cun personas i obras que rebélen quien fumus, quien somos, cun personas que séian houmanas i sanas, cun personas que s’antrégan a pensar para adonde bamos, ne l feturo de l’houmanidade.

 Tiu Abel fui un deilhas, ne l passado serbindo l’aldé an cargos na Junta de freguesie, ne ls sous redadeiros anhos anriquecendo l patrimonho cultura, ne l die a die cumo cunselheiro, ne l feturo será relhembrado porque guardaremos l sou eisemplo d’home cumpleto, de cumpanheiro, amigo.
Faustino Antão

(Ende quédan alguns retratos de las obras de l sou artesanato)