L que quier dezir « Acabar un curso » ?

Siempre achei  stranho  quando andaba a studar  que, an Pertual, percipalmente an Sendin, un familiar miu que tamien tenie filhos a studar na altura, me preguntasse, cumo chegou a fazer bárias bezes, se you yá habie cuncluído l curso.  Pregunta stranha,  antre outras cousas porque an França, adonde siempre passei mais tiempo an toda la mie bida, naide me fazie la pregunta de la mesma maneira. La pregunta neste caso ou melhor las perguntas éran  pul cuntrairo assi : Anton, las cousas cuorren cumo quieres ? Que curso stás a tirar ? Stás a gustar desse curso ?

Mas tamien acuntecie que la pregunta fusse esta: «Stás an que anho agora ?» mas sien aqueilha obsesson (porque acabei por achar que era quaije ua obsesson) de la parte de las pessonas que preguntában se yá habie ou nó cuncluído l curso cumo an Pertual cun esse miu familiar. Se tal cousa nun acuntecie an França ye porque habie ua rezon : nun tenie l mesmo sentido  essa noçon de « acabar l curso ». I inda hoije, se pensarmos bien, naide puode dezir que  hai apenas un curso ou ua sola maneira de acabar un curso mas feliçmente ua anfinidade de cursos: uns cua duraçon maior que outros mas todos cun un  antresse própio, bantaiges i aspetos posetibos ;   i inda bien que assi ye! Ua sociedade nun percisa solo de doutores por eisemplo i cumo tal un canalizador faç tanta falta cumo un adbogado, un porsor ou outra pessona qualquiera que tenga  « acabado l dito curso » para ampregar cumo esse miu familiar de Sendin essa spresson; spresson  que era na realidade (i inda ye puls bistos) mui rebeladora, sintomática de todo un stado de spírito ou mesmo de ciertas mentalidades que inda hoije eisisten, cumo tube la cunfirmaçon inda hai poucos dies quando falei, subre estes aspetos i defrenças que hai antre estes dous países que son la França i Pertual, aqui an França, cun ua jobe licenciada de l’UTAD de Bila Real;  atualmente ne l mestrado, tamien me mostrou essa moça retratos de todos esses rituales que pratican inda hoije ls studantes an tierras lusas nomeadamente na altura de la queima de las fitas ; rituales i tradiçones studantinas próprios a Pertual (cumo tamien acuntece noutros países) mas que son, nun país cumo la França, quaije totalmente  einesistentes. "La queima de las fitas,  por eisemplo, mas que ye esso?" cheguei you muitas bezes a preguntar-me a mi própria, percipalmente quando tamien andaba a studar mas ne l miu caso, an França; tradiçon que tamien surprende muitos  franceses  quando inda nun stan bien al par de ls usos i questumes que eisisten an Pertual…

I inda hoije, quando beio retratos ou que m’acuntece tamien  star an cuntato direto cula realidade pertuesa porque tengo la suorte de poder ir de beç an quando a Pertual, mesmo - cumo yá m’acunteciu - an abril ou maio, debo dezir que quedo, inda hoije, mui mui surprendida quando me dou de cuonta que essas tradiçones cuntinuan inda mui bibas; i esso apesar de la crise i de l zamprego de que son tamien bítimas, i hoije cumo nunca, tamien ls que cunseguen « acabar l dito curso ». Mesmo cun diplomas,  tamien muitos deilhes nun scápan assi i todo a situaçones defíceles i precairas; ls ampregos  que arranjan son « ampregos de la treta » cumo eilhes dízen, sendo por bezes muitos deilhes quaije oubrigados tamien a eimigrar, tanto ou até mais que outros que nun fúrun  tan loinge ne ls studos mas cunseguírun por bezes  um amprego até mais bien pago que se tubissen cuntinuado a studar...

Acabarei  cun mais uas cunsideraçones…

Ua de las últimas bezes que bi studantes an Pertual acerca dua faculdade, fui ne l Porto, i lhembro-me dua moça an special, ua a quien pedi ajuda para ancuntrar l camino que precuraba, bai a fazer dous anhos, era an fins de outubro;  staba cumo manda la « praxe » essa studante,  toda bestida de preto: cun saia, casaco, sapatos i meias pretas tamien… mas cuitada ! Nun sei porquei, mas nunca se me squeciu que tenie un buraco nua de las meias. Un buraco de que eilha se calha inda nun se habie dado de cuonta. Mas quando las meias son pretas i que la studante ye branca de piel, l buraco que tenie uns 5 cms de diámetro, nun passaba despercebido… I na altura,  pensei  l que inda penso hoije : Que pantemineirices, essas praxes ! Que redículo tamien ! You, passei  la mie bida de studante (studante cun poucos recursos financeiros, diga-se tamien de passaige) mas siempre cumo me daba la gana, quier dezir: quaije siempre cun calças de ganga i tee-shirts baratas mas de la quelor que you querie ! Cun buracos ou sien buracos ! Mas ne l final, l mais amportante fui que « acabei l curso » quando achei que debie de ser l’altura (you i nó siempre ls outros !).  I acabei para depuis tornar a ampeçar ou cuntinar outra beç…  Cuntinuar cada beç que ye possible, nesta ounibersidade que ye la bida, ua ounibersidade adonde hai tantos cursos cumo hai quelores, ne l mundo : ua anfenidade de quelores! Sien que haba nunca amposiçones,  lhemitaçones ou bisiones curtas i redutoras de l’eisisténcia. Ye assi que debe de ser i nó doutra maneira. Até al fin !