(esta cumbersa puodie ser feita an qualquiera tarde apuis de ls garotos salirmos de la scuola, porque assi acunteciu sembas de bezes, puodie ser feita por, Nascimento, Aventino, Francisco, Narciso, Silvano, Faustino, Domingos, José Marcelino, Alcino, Casimiro, Diamantino, Felisberto, António Neto, Felisberto de l tiu Vicene, Antídio, Flebiano, Válter, Domingos Neto, Batista, Belmiro, Nascimento, Aníbal i tantos outros camaradas de scuola, que agora nun me bénen a l'eideia (por esso pido çculpas) de l miu tiempo, que morabamos an Beharino, mas que fazírun pareilha nas lhuitas a lhapada que faziemos al cruzeiro culs de Macaneira. Ls de Belharino ganhabamos siempre. Cansadicos todos sudados era esta bica que fazie l milagro)
4 comentários:
Anton Foustino, nien habie ua rapazica an Zenízio para anfitar esse ramalhete?
Carai!
Un beisico,
Delaide
Oulá amiga Adelaide
-Percuras i percuras bien, mas nun amento neilhas nun ye por mal, sabes bien que stou de fuora dessas cousas, nun hai çfrença para mi rapazes i rapazas, sou pula eigualdade.
Mas, i hai siempre un mas, las rapazas de l miu tiempo de scuola, i éran mais que nós nun jogában a lapada al Cruzeiro, sprumenta a percurar (tu quiaje ls conheces todos que you ende screbo) se chegórun a sues casa cula cabeça scalabrada cumo you cheguei?
Éramos nós que dabamos l cuorpo para defrender l honra, tamien era berdade que eilhas apuis de la bitoria mos dában ls agabones i namorában cun nós.
Mais te digo, quando chegaba a casa cula cabeça scalabrada inda las lhebaba por riba para que tubisse juízo.
Un die inda scribo adonde ls rapazes quédan de fuora.
Muitos beisicos i un abraço al tou camarada.
Faustino
Tamien arranjabades cada jogo de lhimpar honra!
Nós siempre jogábamos cun ls rapazes: al chete, a las scundelinas, a la parida, a las palombas,a las corridas,al salta la mula, cun las fisgas, etc, etc.
Essa de las lapadas nun se me lembra se eilhes jogában ou nó, nun se me lembra mesmo, mas si era un jogo bien stúpido...
Só jogábamos, só las ninas, quando era a jogar de morada i mesmo nesse, a las bezes, inda poniemos alhá ninos.
Outros tiempos i outros jogos...
Beisicos
Delaide
Enviar um comentário