12/06/13

palaçuola





La moça chinesa (i que studa anformática an Toulouse antes de tornar outra beç para la República Popular de la China quando acabar l curso) quedou admirada quando me biu, l outro die, dentro de l comboio ne l qual biajábamos zde Paris,  çcascar ua maçana cun muita rapideç  i sien ningua anterrupçon. Anton, you só le dixe assi:



- Ye normal, bonda star aquestumada !



Claro que stou aquestumada ! Cula eidade que tengo yá bien cuntidades de legumes çcasquei na mie bida, zde patatas, maçanas, cenouras (para las cenouras hai tamien ua técnica simpres i rápida !), cebolhas, rabanetes, rabas de las brancas i de las burmeilhas, i esses tupinambos por eisemplo que poucos pertueses cunhécen, tengo la certeza...



I tamien pensei: afinal de cuontas, inda bien cousas poderan daprender ls Chineses(1) cun nós ls Ouropeus(2); i cun nós ls Mirandeses i las Mirandesas,  talbeç mais inda !



Mas l segredo, porque claro que tamien hai un segredo: debie de ser pula cierta essa palaçuola mui bien aguçada por quien you sei i que nunca me lharga. Ye ua cumpanheira que faç tanto jeito !   



(1) « cun 1 bilhon i 313 milhones de habitantes (stimatiba para Júlio de 2006) »  Dado ancuntrado ne l artigo dedicado a esse paíç na Wikipédia, an mirandés.eiqui



    (2) « La Ouropa ten 761 milhones d'habitantes » Dado tamien   ancuntrado na Wikipédia, an mirandés (l artigo subre l’Ouropa).eiqui

1 comentário:

Tiégui disse...

Si, las rapazas d'eilli nun saben se servir d'ua faca! :( mas la faca que spanta l mas nun ye aquesta, m'as l'outra que t'en la garficu!