Bai-se
l bibir çprendendo de la ruodra de ls dies i solta se passadeira adonde caminamos
un die atrás de l outro para fazermos pula bida. Mas hai dies que son mui
çfrentes, fazén mos cuçcinhas, pónen mos piel de pita. A bien ser, ls dies son armanos,
mas çfrentes: armanos porque hai l repetir, scúcen-se de l calandairo; çfrentes
porque nun hai un die armano a outro, passamos por eilhes, hoije un die, manhana
outro die, apuis manhana outro die será, até que nun haba mais manhana i esso
bai a ser quando mos morrirmos. L amportante son las pessonas cun quien stamos
i mos gusta star, cumpinchas d’afeiçon. Apuis hai l arregalar de uolhos ne l çcampado
berde que se mos achega ne l mirar de marfuolho an tierras sien fin. Amostra se
Castilha i Lhion nas bordas de la strada an tierras de Spanha. Qual D.Quixote i
sou cabalho ne l cumbate a molinos! Son quatro ls cabalheiros muntados ne l
cabalho de quatro ruodras que ródan strada afuora a la cunquista de URUEÑA, (Balhadoliç),
la Bila de l Lhibro. Son las muralhas amponientes que arrepassá las fácele foi.
Arregalados ls uolhos, bénen las eimoçones lhougo apuis. Toca-se a ua portalada
que an zlhado ten un placa cun scrito que diç:``UNDACIÓN JOAQUIN DÍAZ”. Ua
rapaza mui simpática abre la puorta, dezimos que Joaquin Díaz mos aguarda, aguardámos
nós. Nanhun l tiempo de spera i ende stamos delantre de un home taludo,
arrimado a sous setenta anhos, de barbas que stende ls braços i dá un abraço
arrochado a Mário Correia i apus mos stende la mano calorosamiente. Ancamína mos
para ua sala adonde mos sentamos i se fala de muita cousa, até de Jesé Afonso,
cantor cun quien Joaquin Díaz tubo l pribileijo de star i mesmo tocar cun el. Nun
bos bou falar deste home ó de sue obra mas solo dezír que criou un spácio de
saber i cultura, adonde toda la Spanha, prencipalmente studantes, ban
ambestigar, fazer recuolhas para purparar sues teses de mestrado i
doutoramiento. Quien qujir puode bejitar eiqui: http://www.funjdiaz.net/index.cfm.
Amadeu Ferreira oufereceu-le alguns de sous lhibros que recebiu cun muito
carino i uolhos arregalados. Seguimo-lo apuis nua bejita a todo l spácio de l
museu i biblioteca i fui ua eimoçon mui grande tener stado eilhi cun ua pessona
que respira serenidade, saber i simplicidade. Oufereciu un lhibro de sue
autorie, Instrumentos Musicales en los Museos de Urueña, a cada un de nós que outografou.
Bien háia cabalheiros que alhá me lhebórun i cun quien tube l perbileijo de
star: Mário Correia, director de Sons da Terra, Amadeu Ferreira grande scritor
de lhéngua mirandesa i l spressibo maior pintor de nuosso praino, Manuel
Ferreia. Falou-se apuis de cumo serie eimocionante andar pulas rues de Miranda
de l Douro i tener un spácio assi, que amostrasse la nuossa lhéngua i cultura
mirandesa i denificasse la mimória de las gentes de l praino, de sue fala i la grande
riqueza cultural. Tubíssen ls senhores de l poder, lhocal i nacional un
pouquito de cuncéncia que nun hai balores mais grandes que la mimória dun pobo
que queda nas sues cantigas, nas sues danças i sue fala. Todos mos bamos, mas quédan
ls registros agarrados de mimórias de todo l saber dun pobo, se para tanto
tubírmos angenho i arte.
Nunca
mais bou me bou a squecer deste die, sábado, 4 de Maio, tamanho die tamanha
romarie. L cabalho de quatro ruodras ende stá outra beç a camino, URUEÑA, cun
sue muralha, queda-se aonde siempre stubo, i nós ende a la cunquista. Agora ua
tierra mos chama: San Pedro de Gaíllos, acerca de Segóbia. Un pobo mais
pequeinho que Sendin. L que hai alhá? You bos digo: l “Museu de l Paloteo”,
Scrito na lhéngua nuossa, mirandesa: Museu de ls Dançadores. Puode-se dezir
baixico ó a buona boç: Museu de ls Dançadores, se fuordes capazes de me dezír
que nun sona bien, podeis anrezinar bos, you cuido que un gusta de scuitar:
“Museo del Paloteo”. Cumo un home bai fazendo lhaços, nó lhaços para caçar
perdizes ó coneilhos mas lhaços de amisade. Scuitai: «Nós otros benímos eiqui
de Miranda de l Duero, Sendin, Portugal para bos besitar!» «Nó lo creo, bós
sodes, sodes…Mário Correia!». «You miesmo.» Un abraço, un lhaço, hai lhaços que
son mui fuortes, ban se custruindo i apuis hai que los mantener. Fui esta
amisade, este lhaço feito pula anternete i nunca se habían conhecido
personalmente. Bejitemos l pequeinho museu que mos amostra de modo simpres la
bida de pessonas houmildes i l modo cumo ampeçórun a fazer renacer las danças de
palos nesta tierra, nun mui çtante de Madriç. Amadeu Ferreira na çpedida
fala-le na denidade de las pessonas i l modo cumo la musica i la dança puode
amostrar la grandeza de un pobo. La Tie que lo scuita de eimoçon las lhágrimas çprenden-se
de sous uolhos i ende bénen cara abaixo, zbía-se un pouquito para atamar la
calor que se le achega al coraçon.
Sem comentários:
Enviar um comentário