Ua palabra de gratidon als Capitanes de Abril

Deixo eiqui ua palabra de gratidon al miu camarada Capitan Salgueiro Maia que na madrugada de 25 de Abril de 1974 reuniu ls sous homes de la Scuola Prática de Cabalharie de Santarén, falou-les de l stado a que Pertual chegara i treminou dezindo:

“Quien quejir benir cumigo, bamos para Lisboua i acabamos cun esto.

Quien fur boluntairo sal i forma, quien nun quejir salir queda eiqui!”

Benirun todos, sin scepçon, mesmo sabendo que corrian riscos, ancluindo l risco de nun regressar cun bida.

 

Deixo eiqui ua palabra de gratidon a bários outros mius camaradas Capitanes de Abril que saíran de Santarém, de Mafra, de Tancos, de Santa Margarida, de Estremoz i de Vendas Novas, rumórun a Lisboua porque nun se cunformórun cul Paíç an que bebian.

Deixo eiqui ua palabra de gratidon a todos estes mius camaradas que ne l die 25 de Abril de 1974 cuncretizórun l suonho dun pobo qu'ansiaba pula lhibardade cumo l mais amportante balor i pula Democracie cumo sistema.

 

Deixo eiqui ua palabra de gratidon als mius camaradas que nun caminórun para Lisboua an busca de cargos ó de lhugares amportantes. Cumo bien retratou Sophia de Mello Breyner, “Salgueiro Maia fui aquel que dou todo i nun pediu nada an paga”.

Tal cumo Salgueiro Maia esses mius camaradas Capitanes de Abril, fúrun un eisemplo notable para muitos pertueses de ls nuossos dies, que tantas bezes ceden a las seduçones bazies i efémeras de la sociadade de cunsumo i outras tantas bezes mieden l balor de ls homes pul denheiro ó puls bienes qu'ostentan.