Anterroguemos-mos !

Inda nun hai muito, bi ua reportaige subre l’oulibicultura ne l sul de Spanha, na Andaluzie eisatamiente. Fúrun mostrados bários aspetos. Antre las pessonas antrebistadas, alguas dezien: “Ye berdadeiramiente ouro, para nós, l azeite que estas tierras son capazes de produzir!”

Puis... Mas l que achei tamien antressante fui l’oupenion bien mais cuntrastada, defrente até, de pessonas, specialistas an ciertos casos, que quejírun pul cuntrairo apuntar todas las cunsequéncias bien menos posetibas que representa ua monocultura cumo ye l caso de l’oulibicultura, nessa region de Spanha, ou até qualquiera outra monocultura an qualquiera outra region de l mundo, quando inda porriba ye praticada, cumo tamien ye percisamente l caso, de forma antensiba cun outelizaçon maciça de yerbicidas i outros produtos chamados “fitosanitários” mas solo muitas bezes para eiludir mais dun. Cul percipal i único oubetibo de cunseguir taxas de produçon las mais altas possibles...

Mas sien que todo esso puls bistos nun deixe tamien de tener un custo. Un custo eilebado. Cuntribui na realidade l’oulibicultura antensiba tamien para acentuar l fenómeno de zertificaçon. I quando chuobe muito cumo ten sido l caso nestes últimos meses, ls suolos alterados antes de todo finalmente pula mano de l home acában por ser ancapazes de absorber l eicesso d’auga cumo cunseguien fazer naturalmente i an grande parte, ne l passado.

Ora nestes dies, todos quedamos mais ua beç (ou inda mais, desta beç?) ampressionados cula fuorça que l’auga ten i inda cuntinua a tener an muitos sítios... Mas tenemos que mos anterrogar tamien.

An Sendin por eisemplo, sei que inda se outeliza i durante muitos anhos se outelizórun ls yerbicidas. Sien que tubíssen sido splicados, tanto cumo debie de haber sido pula cierta l caso, als sous outelizadores, stou cumbencida, todos ls perigos i cunsequéncias que inda hoije puoden repersentar todos esses produtos químicos i benenos al fin i al cabo que son outelizados para tenermos l’eiluson que somos capazes, nós ls homes, de poder cuntrolar la Natureza cumo a nós mos dá la gana.

Un anho, an Sendin, até debie de ser na Primabera, quedei mui surprendida mas assustada tamien! Ralos éran ls sotos que nun fazien publicidade i nun ponien bien an ebidéncia, até na rue i nas montras, para que todos la cunhecíssen i la procurássen, essa marca d’ourige americana de yerbicidas ou essa outra tamien, almana, que nun ye preciso nomear aqui nien ua nien outra, bisto stáren dambas a dues inda mui persentes anfeliçmente an muitos países de l mundo, mas que siempre mentírun (i outras tamien...) subre ls perigos reales, menimizando-los cumpletamiente, neste caso tamien para l home… até séren julgadas an tribunales i puostas an causa, an ciertos casos, essas i outras marcas de yerbicidas ou tamien de pesticidas, muitas bezes por associaçones de cunsumidores i de agricultores, sendo estes ls purmeiros a séren diretamente afetados por problemas grabes, por eisemplo de cancro, oureginados pula outelizaçon na agricultura de produtos químicos.

Anterroguemos-mos nós tamien anton! I fágamos todo l que ye útele mas tamien ourgentíssimo fazer a fabor de la Natureza de que nós tamien fazemos parte, será neçairo lhembrar essa eibidéncia assi i todo mais ua beç? I anquanto inda fur possible !