Ua «moça» de 36 anhos

Yá se screbírun neste blogue muitas reflexones que ténen que ber cula eidade. L que ye la mocidade, l que ye la belheç? Nun ye fácele chegar a un consenso i cuido que l' eidade ye relatiba. Para Manoel de Oliveira ua pessona cun nobenta anhos ye nuoba, mas para un nino ua pessona cun binte puode ser bielha. Inda assí cuido que hai alguns eisageros nessa «relatibidade».

Parece-me que la sociedade anda hai uns tiempos a fazer de cuonta que la belheç nun eisiste i que la mocidade dura eiternamiente. A miu ber ua de las causas desta «eiterna mocidade» ye la precariedade que bai oubrigando las giraçones mais nuobas (i las que yá nun son assí tan nuobas) a star siempre a «ampeçar» de nuobo, a ganhar menos (porque afinal de cuontas somos mui nuobos), a ber ampedidas alguas possebelidades que seríen normales nun «adulto».

Sobre esso, poderie dezir muita cousa, mas cuido que nun l farie tan bien cumo l' atriç Joana Manuel, que bos cumbido a ber i a oubir. L sou testemunho ye pessonal, mas apesar desso, ó talbeç por esso, hai muitas pessonas que se eidentifícan cun el. You tamien tengo algues cousas an quemun cun eilha. Sei mui bien l que quier dezir precairo, sei mui bien l que ye ser zampregado i l que ye ser «zampregable», sou filho de pais que yá nacírun adultos, tengo 36 anhos i nun gusto que me chámen moço (aliás, quando me cháman moço, tengo buntade de dar la mesma respuosta que Francisco Jesé Biegas quier dar als fiscales de las Finanças).

Mas yá bonda de palabras mies. Oubi agora a Joana Manuel.