Apersentaçon de lhibros de Amadeu Ferreira / Fracisco Niebro na lhibrarie LELLO, ne l Porto

retratos de Alcides Meirinhos

 

 

 

Mira-se la Torre de ls Clérigos que se mos mostra quaije defronte i ende stá ua de las lhibraries mais amportantes i guapas de l mundo. La lhibrarie Lello, ne l Porto. Subir sues scaleiras amponentes i mirar aqueilhes lhibros todos ye ua eimoçon mui grande. Fui nun sfregante que toda la lhibrarie chenica de giente.

L porpiatairo de la lhibrarie dá las buonas benidas. António Batista Lopes, de la Eiditora Âncora, fai la apersentaçon de l autor, Amadeu Ferreira/ Fracisco Niebro, cumo Grande Scritor i agradecendo als apresentadores de las obras: José Emílio-Nelson, poeta i critico lhiterairo, que apersentou l lhibro ARS VIVENDI ARS MORIENDI; l senhor D. Manuel Martins a quien agradeciu de modo special pula çponibilidade para apersentar i falar de l remanse, TEMPO DE FOGO.

José Emílio-Nelson diç mos que l lhibro ten ua fuorça que surpreende acrecentando que an ARS VIVENDI ARS MORIENDI, Fracisco Niebro «…soube confrontar-nos com questões do pensamento que valorizam outros desafios autênticos que nos propõem feixes complexos de significados.» L zafio que l poeta zambuolbe ye l de mos cunfruntar cula eignoránça de la “melodie de la muorte” i  lhembrar que “a modos que l tiempo se bai” ficamos mais sabidos “na eignorança” que acaba por componer un angenhoso “Utopismo da ignorância da morte”.

D. Manuel Martins, bispo emérito de Setúbal, arrimado a sous 86 anhos, ampeça saludando to ls persentes i cun grande sentido de houmor: «bimos l purmeiro sponente que foi guapo, (referindo-se a José Emílio-Nelson) agora bamos a ber l senon que sou you.» Diç que ne ls ampeços de ser cura stube na Cedofeita i tenie un porgrama na rádio de cumbersas i que l lhibro ARS VIVENDI ARS MORIENDI se las fizo lhembrar, del dezindo: «Este lhibro faç me lhembrar ls lhibros mais guapos de l Antigo Testamiento – l lhibro de la sabedorie. Ten saberes tan perfundos i purfeitos que apetece chamar-le L LHIBRO DE LA SABEDORIE».

Subre l remanse Tempo de Fogo dixo que fizo ua leitura cun antusiamo creciente i que el fala dun tiempo que nun debie de fazer parte de ls pobos, eisemplo de la stória de Pertual. Acrecentando: “Fica o meu obrigado pelo prazer da leitura e pelo muito que me ensinou e pela reflexão que me obrigou a fazer”. Inda dixo que ls cuntenidos de Tempo de Fogo, lhougo ne l que a Dius diç respeito….puode ser ua çcubierta de la grandeza de l home i sous balores”. Acaba dezindo subre l Aneixo cun que l lhibro acaba: “Valeria a pena também publicar esse anexo em separado e que pudesse ser estudado. Um livro muito bem pensado. Pode enfileirar com os melhores pedagogos modernos. O livro é um presente num espaço que é um presente na cidade e para a cidade”.

Amadeu Ferreira/Fracisco Niebro, apuis de agradecer  todo mundo, an special a todos ls sous eiditores i als dous apresentadores, i de falar na honra na star ne l templo que ye la lhibrarie Lello, splicou porquei tantas obras screbie i cun bários pseudónimos i na bários géneros, oureginales ou traduzidas: «You preciso de todos eilhes para me dezir». «…scribo zde nino, l purmeiro lhibro que publiquei tenie 49 anhos, hoije tenho 62…scribo to ls dies…mas las bidas que fui amuntonando preciso de las dezir…nós tenemos mais de siete bidas, tenemos ua capacidade de subrebença mui grande… anque seia defícele, tengo un amor einorme pula bida i dá-me guosto partelha-la. Ye un modo de nun ambelhecer i de nun quedar boubo».

De l muito que dixo Amadeu Ferreira quedou la pregunta: porquei ye amportante ua lhiteratura na lhéngua mirandesa? I na repuosta a essa pregunta falou de bárias cousas, cumo tal: la denidade de la lhéngua mirandesa i de la giente que la fala, puis «çpreziar ua lhéngua ye çpreziar las pessonas que la fálan. Solo las pessonas ténen denidade i resgatar esta dinidade ye ua proua mui grande»; la necidade de dezir mundos que de outro modo nun serie possible dezir, dezirmos-mos i dezir l mundo;  ne l marabelhoso que ye participar na criaçon dua nuoba lhiteratura, puis l mirandés nun ye solo spresson oural.

Acabou preguntando, “para que sirbe todo esto se l mirandés qualquiera die se acaba?” I deregindo-se als persentes preguntou: «Quien d’antre ls persentes nun se bai a morrer? Anque todos i cada un de nós se baia a morrer, nun deixamos de lhuitar pula bida. La bida ye un dreito, mas tamien un deber. Lhuitar pula bida de l mirandés ye tamien lhuitar pula nuossa bida. Até quando? Até quando ls mirandeses lo quejíren.»

Bien Haia.»

Apuis desto, a modo brechas adonde mos puodemos mirar, nada mais you tengo a acrecentar. Para mi foi ua alegrie mui grande tener assistido a todo esto. Diç la mie tie que se me pónen ls uolhos a relhuzir. You nun me beio a mi, mas sei la calor que me bai andrento i se ls nuossos uolhos dízen la nuossa alma…

António Cangueiro