La mie caneta premite-me nuobos caminos
zbios surprendentes
quando cul miu punho te dedico un pensamiento
sin retorno, oureginal ye esso que la caneta canta
mesmo ua lhapezeira rasca assina a tinta permanente
permanente la dedicatória que l peito
momentaneamente assaltou
i an zlizes artísticos zenhou
porque l'assinatura trai cun eilha la personalidade que l'anima
garatujo defícele de antender
porque la lhetra bai quedando zlida
i heisitando nas ancruzelhadas an que la bida l'assoprou
hai un camino an cada punta, an cada rebuolta
de la lhetra que daprendiste a zenhar
i aqueilha fuorça cun que la boteste nua piçarra negra
fui ganhando alas i mesmo ua rúbrica solo
ye la tue marca, ye l bolo que t'eidentefica
i t'achega de la purmeira lhetra
Sem comentários:
Enviar um comentário