Pequeinhas cousas son las paixones que me susténtan

Todo tu puodes quando quergas!
Manda morrir la tristeza ne l mirar para que las paixones te médren drento de l querer.
Relhúzen-te ls uolhos quando te apaixonas, dezies-me. Nó por alguien me arrefiro, mas por algo. La tue menina remolina drento ls uolhos quando me falas cun antusiasmo.
... Tenes rezon, dixe-te. Sien paixon nien ua flor me pega ne l jardin!
Sien paixon naquilho que fago, quedo cun penas, ls uolhos pérden las chiçpas, las piernas drúmen-se, l´alma scapa-se-me de l cuorpo i, l cuorpo, esse cuitado, mete-se an barranco antes de se morrer para que naide l béia morré-se...
Mas l que tu me dizes de tues paixones,? percureste-me apuis.
Puoden ser cousas tan pequeinhas amigo! Bonda mirar para ua aranheira i alhá ber la perla an beç de gota, la bida de l´aranheira an beç de la mosca muorta, sentir l cheiro doce de flores anque solo haba suberbibido la scoba amargosa, cun la secura de la Primabera. Inda hai pouco teiempo que me dei de cuonta que las mies paixones ancoméçan adonde ancomeço a ber poesie.
Bés?! La poesie que mos asparece que ye de grande einutelidade, a fin de cuontas ye l ampeço de las mies paixones.
Mira para isto que stou a fazer. Nun stou solo a calcer estes uobos drento d´auga caliente para apuis amassar l folar. Nestes uobos yá you beio mais que uobos, stou a ber muita mais adelantre. Al mexer estes uobos amarielhos para que nun se cuozen i cun la batedeira neilhes fago un remolino, remolino tamien l pensar i, cun la paixon cun que ls mexo, an beç de gemada, isto yá ye folar i delantre de nós yá stá la chábena cun chá pala merenda, l folar cun la chicha a ressumar unto pal pan amarielho i ameroso i, arriba de todo yá oubo las palabras que deziremos cun la paixon pulas cousas que queremos andunar.
Las mies paixones son de cousas pequeinhas porque, a las grandes ye custoso chubir i l cuorpo yá nun se me antesa para grandes fugidas.
Por falar nisso, pon-me eiqui na massa mais un pouco de farina i apuis, azeite i unto. Apuis que you acabe de sboldregar la massa bien sboldregada, pones-me ua farinica para l´apartar de la masseira i tamien nas mies manos para l passar apuis la rapadeira.
Bés!!?? Stou a fazer la massa cun paixon porque, yá la beio ambuolta an amisade al redor de la mesa, adonde l folar ye çculpa para me sintar a la tue borda.
Assi sendo, ls quadriles nun me duolen, nó porque nun me duolen mas porque la paixon nun deixa que sinta ls delores...
Son feitas de cousas tan poucas, las paixones de giente simpres!