La primabera cumpre siempre la pormessa de florir

Chégan-me cheiros a casa trazidos pula primabera, anque seca, anque las yerbas stéian spaixaracadas, anque las árboles lhuíten spetando las raízes mais fondas a saber d´ua pinguita de frescura, anque l aire me chegue seco cumo an agosto i me seque la piel i las narizes, anque isto i muito mais, la primabera bieno a rebentar de flores a toldiar cun cheiro, cumprindo la pormessa de florir.
Las cereijeiras que siempre florírun anterbaladas, pormeiro a pie de casa, apuis outras un pouco mais arriba i que maduras se fázen negras, apuis outra na rodeira, outras mais tarde por baixo de l baranda, duras i grandes que nien nuozes i por fin las brancas, menos antulhadiças por nun séren de la quelor de la paixon, mas gustosas que you sei alhá. Florírun astanho al mesmo tiempo l que lhebará a grande fartura, fartura a mais an poucos dies, aquilho que darie cereijas para dous meses. Se benir la gilada serán todas barridas por stáren todas na mesma situaçon de medrar i, ou seran de mais, ou ningua.
Las nabiças dan lhuç a la quelor cinza i castanho de l termo, besitadas pulas abeilhas fungando al sou redor.
Chobiu onte, mas tan pouco que nien squiera la pila de l jardin quedou cun uas pinguitas d´auga pa ls páixaros matáren la sede. Puode ser que benga hoije. Dezie-me hai un cachico la pastora, anquanto apanhaba las coubes sgrelhadas pa ls cochinos: Eilhes dában auga par´hoije, puode ser que benga, puode ser que ls santicos a quien se fazírun yá nobenas an todos ls lhugares, mos la mánden.
Bá, trazei l ganado parqui pa la cortina que bien pouco dében apanhar porende a fuora, dixe-le you!
You habie sumiado antremoços para zanfatar i adubar la tierra apuis que anterradas las yerbeiras. Stan rente al chano a florir. Se benir auga la yerba abáfa-los; se nun benir, la seca mata-los.
Si c´assi, Lídia, mais bal que las canhonas máten la fome por hoije. Guardas ls morangos i estas coubes que nun se sgrelhórun que regadas dan caldo mesmo no berano. Eilhi mais alantre, guarda las fabas que fúrun regadas i ls alhos que alhá aguantórun cun ua auguita que mie mai le botou cun l regador, cun sues poucas fuorças i sou muito bagar.
Séia cumo fur, eiqui sinto-me ne l paraíso i son quinze dies que me bólan que nien semientes de lheitariega an die de airaçada. Agarro-me als dies mas ls dies bólan-me. Nas nuites, mais strelhadas, suonho cumo an mais ningun sítio i an suonhos me scapo, mas ye eiqui que siempre torno, als oulores, als retratos que tengo na mimória, als fincones adonde pouso ls mies pensares, als terceiros de casa de mie abó Ana a apagar l puolo de l tiempo nas arcas de las lhembráncias, ne ls scrinhos a spera de farina de l molino de tiu Torrado adonde tie Eilísia inda hai pouco tiempo fazie farina anque muita primabera por eilha houbira passado, uas cun secura nas piedras que las fazira rodar, outras a antrá-le pul molino adrento i a todo lhebar nas mundiadas.
Ye l nuosso Praino i bonda-me!!!!