Mie querida Ana Marie
por adonde bós stais
you sou l buosso nino
ó bós yá nun bos lhembrais
Essas delores çcunhecidas
esses ancuntros cul çtino
quedórun grabado a fierros
ne l cuorpo, ne l mirar, deste nino
La bida puode passar
ls anhos puoden cuorrer
mas nunca mais bou a squecer
L que anton quedei a sufrer!
Yá passei por muita delor
ne ls Abriles de ls sessenta i quatro
mas yamais squecerei, l huorror
que fazirun de mie diabo a quatro!
Por isso digo à Ana Marie
que nun squecer isso; yamais
la delor há-de passar
mas la lhembrança; nunca mais!
Fui buono tener-me salbado
i acredito que agradecida, estará
i las fuorças que tu me deste
Dius alhá te recuompensará!
Porque nada ye por acauso
i inda me queda muito para fazer
i a mie inda nun me chegou
lá hora marcada para murrer!
Recuordo à Ana Marie
nua plena, de realizaçones,
de suonhos, de amor, paç, felicidade.
Que ardei cumo recuordaçones
Mie mai mie maizica
porque tenie que assi ser
deixeste-me eiqui solico
Neste mundo a sofrer
Mie mai mie maizica
Guapa mai Dius me dou
Quedei porqui solico
Nun sei adonde stou
Nun sei adonde stou
Nun sei l que acunteciu
Lhieba-me pa l pie de ti
Qu´este mundo yá nun ye miu
José António Esteves
2 comentários:
Tiu Jantonho, bós ainda nun podeis ir...apuis quien farie bersos assi!? I dezir cousas tan guapas nun ye para qualquiera. Bós botai-le ye mais cousas i se perciso for todos ls dies.
Saludo,
antonho cangueiro
Caro amigo Jesé Antonho,
Ls delores son malos i la bida trai-mos l que nunca speremos nin mereciemos. I quien ls sinte sabe-lo melhor que naide. Assi i todo cuncordo cun bós i gostei de bos ber screbir:
«i inda me queda muito para fazer»
Queda si senhor, anque yá muito téngades feito. I acraditai que todos speramos l que ides fazendo.
Inda afuora esso: ls buossos nietos ténen de falar la nuossa lhéngua i inda teneis de le dar ua upa baliente. POrtanto, inda bos queda muito para fazer.
Abraço arrochado
Amadeu
Enviar um comentário