Ganas de bencir

Las nuites nun éran l melhor, nien quando l tiempo se passaba mais debrebe, rendien-le muito, solo nun l rendien mais porque l cuorpo andaba muorto, de tanta lhabuta.

Agora solica, habie que tratar de l crios, de la casa, i de ls burricas que éran inda las solas criaturas que le tirában algun peso d’anriba de l çamarro.

Derruída de tanta canseira, mas nun íba a ser eilha que se darie por bencida, assi habie jurado a eilha mesma que a Fracisco nun percisaba de le dezir, quando terminórun a scapar-se pa l’eimigraçon, fazer cumo muitos d’acá yá l habien feito.

Habie ua sumana que s’apartórun, inda nun era tarde, mas yá le rendie l tiempo, yá le fazien faltas las amboras.

Será que l agarrórun a passar la raia i l ténen preso sien dezir nada só para quel diga quien ye l passador? Ls paisanos son uns lhafraus, l miu home ye pequeinho i eilhes quieren peixe taludo!

-Será que fui yá an Spanha que ls crabineiros le botórun mano i cuídan que ye un de ls cuontras a Franco, mas el até fala bien l spanhol, nun ten que tener miedo i que solo quier trabalhar, i quier ganhar uas “perras” i tornar pa la família!

-Se calha stá todo bien you ye que sou ua tonta, penso todo mal, ambento queluobras i lhagartos  i yá ben ua carta a caminho!

Era assi, nun fussen ls ninos i tener que tocar la bida de las huortas que tenie arrendadas, ua baixa na Beiga i las lhatas nas Fernandinas da meias i serie l mais de l tiempo a remoler ls pensamientos.

Bien bezes l sou tiu recomendou, mulhier deixa la baixa i las lhatas por fabricar, dambos a dous ye ua cousa tu solica ye outra.

Mas qual quei, i esta manhana era ua deilhas, zaiunou-los, la nina de chinchin, l nino pula mano i ua guelhada na outra yá las burricas íban ounhida i d’arado ne l jugo a caminho, que se fazie tarde.

Las ganas de bencir nun fazien las cousas por menos, assi l sou Fracisco habisse chegado bien, tubisse sido apreitado cumo querie, que nun habie de ser pul sou lhado que ls atalancadeiros de la bida la derruien.

Quando l conheciu i recebiu cumo l home de la sue bida, para alhá de muitas cousas que le dixo ua deixas era que podie cuntar cun eilha pa l bien i pa l mal, eiqui ou an qualquiera parte de l mundo.