Anterrogo-me sembas de bezes, mas scalha nunca bou a tener repuosta…

(esto que eiqui se bei nestes retratos ye crime)

Será que nós, ou melhor alguns, cumo sociadade solo tenemos buns modos se stubirmos an ditadura?

Será que percisamos de tener siempre ua mano de fierro a mandar, las polícias, ls tribunales a pie para tenermos respeito pula natura, pulas gientes, animales, páixaros i todo l demais?

Adonde moro inda hai grácias a Dius muito arboledo, arboledo que sobrou de las muitas custruçones que porqui fúrun custruídas, mas por bias de la crise i de muita begiláncias de las outarquies, quedórun remendos que fázen hoije l regalo de todos nós, la morada de muitos páixaros i cumo to l mundo sabe son ls lhimpadores de l dióxido que sal de las gientes i altemobles. Cumo ye questume dezir an conjunto cula sierra de l’Arrabida ye l pulmon desta region de Setúbal. 

Mas peçque nien todos assi cuídan, hai alguns que cuídan i pénsan que ende ye l bazadouro daqueilho que nun quieren, que ye ende que debe quedar aqueilho que bótan fuora, sien respeito nien duolo çfázen-se de l que le stroba i nun son capazes de l lhebar para l sítio cierto pa las lixeiras municipales para assi tomar l bun caminho.

Isto nun ten haber cula crise, ten haber cula falta de cultura, de nas sues cabeças nun antrar un modo de bida que respeite la natureza, esses, esses que assi fázen son filhos de la natureza queilhes mátan çpejando antulho an todo quando ye arboledo, mas nun merécen la natureza, solo percisában que la natureza ls botesse fuora.

L pior, ye que por esse paiç afuora l que nun falta ye lixeiras a cielo abierto, sítios adonde esta prática ye feita sien duolo nien piedade por naide, giente que mora a pie de nós i nun merece, pessonas que nun merecen  ser tratadas cumo als demais, nun merecen tener l mesmo trato que aqueilhes que se sfuorçan por tener un planeta mais lhimpo, mais saludable, trátan las huortas, ls huortos, lhímpan las rues, respeítan l planeta tierra.

Solo tengo spráncia que las nuobas geraçones me déian la repuosta, téngan cuncéncia de l mal que fai botar fuora lixo sien ser tratado, se assi nun fur l planeta cumo sítio saludable ten ls dies cuntados