Pedírun-me pa screbir un testo sobre la solidariedade i ls probes. Podia falar de muita giente, mas perferi falar de pessonas coincidas por todos. Lhembrei-me anton de l persidiente Cabaco Silba i de la sue tie, dous bielhicos que bíben cun mui pouco. Marie, cuitadica, ten ua penson que nun chega als 800 ouros, depiende de l sou home para bibir. Aníbal, cuitadico, ten mais que ua penson, mas todas juntas, nun le chégan pa pagar las çpesas.
Mas la pobreza nun atinge solo la terceira eidade. Marie Luís Albuquerque tamien ten rezones de queixa. La probe menistra de las finanças solo recibe 6000 ouros de ordenado i, cumo ten trés filhos pequeinhos, nun cunsegue poupar. You solo spiero que l gobierno nun caiga tan depriessa, porque nun sei cumo eirá esta tie bibir.
Eiqui stán dous casos coincidos que me párten l coraçon. L que bale ye que las soluçones eisísten i són fáceles de poner an prática: ye oumentar ls ampuostos i cortar ls ordenados desses ricos que gánhan 600 ouros por més. I pronto, assí podemos ajudar quien mais percisa.
2 comentários:
Buonas nuites Firmino.
L que me párte l coraçon ye que, culas soluçones que stan a poner an prática an Pertual, las zeigualdades antre ricos i pobres nun póran d'oumentar.
L que me párte l coraçon ye que somos l Paíç de la Ounion Ouropeia cun maiores zeigualdades sociales.
L que me párte l coraçon ye que las políticas que ténen sido seguidas, faborecen la cuncentraçon de la riqueza, que ye, para mi, la percipal causa de la pobreza.
L que me párte l coraçon ye nun ber soluçones para la diminuiçon de la cuncentraçon de riqueza, de la pobreza i de la zeigualdade social.
Parabienes a bós Firmino por este guapo testo sobre la solidariedade i ls probes.
Un arrochado abraço,
Leonardo
Buonos tardes caro Firmino
Ende stá un bun testo, cun sentido, porque por andrentro desta zgrácia toda que mos arrodeia inda tenemos que tener sentido d'houmor para cuntinar lhuitando,
Pena ye que bien a pie de nós to ls dies ande muita buona giente que fala, fala nas frénças, nas políticas malas, mas eilhes tamien son repunsables, porque ponírun esta i muita outra giente ne l poder. Conheces caro amigo Fir aquel dito de l pobo "habie un tiu que dezie, agarrai-me que se nó bou-me a eilhes, mato i çfolho, mas cumo l pobo ye anteligente nun l agarrou i el quedou paradico, el ganhaba tanto cumo eilhes.
Pena ye caro amigo que bien a pie de nós ande muita giente que ganha muito i nien sabe porquei, mas sabe que hai zigualdade, mas nun sabe ou nun quier saber que la rezon dessa zeigualdade ye porque uns gánhan muito i outros pouco, quantas bezes ls que gánhan muito nada fazírun para l merecer, ténan-lo porque l sistema dantes assi quijo, nun fui pul patrimonho que dórun al sou paíç.
Un grande abraço, i se podires nun te squeças que ne l die 3 de nobembre(deimingo) l'Ass, C. i R. Nial de la Boubielha fai l sou magosto, eili bien acerquita de l stacion de la Fertagus (corroios) adonde yá tomemos café ls dous. Cumo moras an Lisboua (cuido you) dá ua scapadela que tenemos muito gusto an te tener cun nós i inda comes uns bilhós
Faustino
Enviar um comentário