Cun respeito pulas oupeniones de todo mundo, nun puode este blogue publicar algo que puoda ser antendido [andependientemente de l oubjetibo de ls sous outores] cumo porpaganda eileitoral partidária, puis stamos an tiempo de campanha eileitoral, i esse nun ye esse l sou oubjetibo.
Por esso saquei dous artigos de Almendra i un de Fir, dambos a dous de sentidos cuntrairos i de que solo agora me dei de cuonta, mas que podien ser antendidos naquel sentido.
Admenistraçon de l blogue
Amadeu Ferreira
Por esso saquei dous artigos de Almendra i un de Fir, dambos a dous de sentidos cuntrairos i de que solo agora me dei de cuonta, mas que podien ser antendidos naquel sentido.
Admenistraçon de l blogue
Amadeu Ferreira
24 comentários:
Muitu matais la cabeca cu'la pulitica !
Nu hai mellor que'l votu an brancu !
Rapidu, eicologicu, eiconomicu,...
Buonas nuites Amadeu e Tiégui,
Nestes radadeiros dies de campanha parece-me mui amportante esta tomada de posiçon de Amadeu, eissencial pa la buona cumbibéncia de todos nós, que somos defrentes.
Delantre las grandes deficuldades que ls nuossos gobernantes teran para cumprir l'acuordo cul FMI i para mantener la buona bibéncia i cumbibéncia de todos nós ls pertueses, l'amportante parece-me nun çperdiçarmos l poder de l boto, que fui para esso qu'alguns de nós, moços Oufeciales, arrisquemos la bida quando fazimos l 25 de Abril.
Nesta fase defícel para Pertual, nun podemos fugir als cumpromissos i a la respunsabelidade de botar, nun debemos acomodarmos cula scolha de ls outros, nun podemos caer na tentaçon de l'aceitar l que ls outros quieren.
L'amportante ye tenermos zeios outénticos, ls nuossos buonos zeios de melhorar l bien-star, la culidade de bida de la sociadade pertuesa an giral. Para esso you acho que nun podemos çperdiçar l poder de l boto.
Aprobeito pa t'agradeçer, amigo Tiégui, este tou cúrtio comentairo, que espoletou este miu, i pido-te, zde yá çculpa, se t'oufendi cun algua palabra.
Un abraço
Leonardo.
Amadeu,
sempre antendí l froles cumo un spacio de lhibardade.
Nun quiç fazer porpaganda eleitorial i nun sequer antendo cumo ye que l miu testo poderie ser antendido nesse santido, até porque las críticas nun yeran nada subtiles.
Creio até, que mesmo que quejisse fazer porpaganda abierta a un partido, nun haberie mal nanhun nesso.
Respeito la buossa decison, mas nun la antendo i nun stou de acordo cun eilha.
Un abraço,
Fir
I l títalo de l lhibro de Stéphane Hessel ye « Indignez-vous ! » (Andignai-bos !)
Mas cumo ye possible se até l títalo acaba por un punto de sclamaçon ?
Un punto de sclamaçon !!
Caro Firmino,
Nun te acusei de fazeres porpaganda eileitoral. Mas l tou testo fala nun partido, l PSD. Stamos an campanha i esso nun poderie ser aporbeitado por cada un para falar noutrros partidos.
Bien sei que la mie decison nun ye popular, nien spero que cuncordes cun eilha. Para mi bonda que seia respeitada.
Abraço
Amadeu
No, no you nun stou oufendidu, an nada :)
Boh, you nun gustu muitu d'aquestas cousas de pulitica, niên las antendu.
La pulitica yê cume un viciu, eigual al futebol. Son cousas que pecisamus pr'andar pu'la vida, pra falar y amentar.
Mas d'antes nun se pecisaba... apénas son nececidades que criyamus. Cume lus telmobles, lus Ipads, lus...
Y sabeis ua cousa ? purqui'que nun vutais todus an brancu ?
Si purque agora aquissu todu yê cume la cunta de las calças azules; "quiês que te lu diga ou quiês que te lu cunte?". Ou se creis yê cume matar un cuchinu c'ua faca ou ua navalla, yê la mesma cousa nun ye ?
Pudeis vutar PS, PSD, PLPM ou KKJHJKKJJHJ, tantu da ya que teneran que fazé-l que l'Ouropa manda!
Assi que'l votu brancu yê un bon cumprumissu :)
Buônu... pulitica pra tras ! Hai mas que xurdir, no ? Nun perdades tiêmpu cun las storias dal FMI, DSK, Sarkozy, PS y PSD. Fabriquai ua huôrta, punei alla batatas, vainas, tumates, seladas y froles.
Que tengades proua cu'las vuôssas jeiras y nada mas. Y ya vereis que prontu ides a squecer la pulitica !
Buonas nuites,
L boto ye cumo l'amor, ua fuorça (para gobernar) capaç de mudar l mundo.
Naide debe deixar de botar, porque esso ye aceitar l que ls outros quieren para mos gobernar.
Un abraço
Leonardo.
Amadeu,
Nun antendi que Firmino stubisse a fazer campanha assi cumo you nun l staba a fazer, stabamos a referir fatos.
Tiégui,
Hai que matar la cabeça cun todo, nós tenemos miolhos para pensar i debemos botar ne l que acharmos ser l que melhor defende l que pensamos i queremos.
Leonardo,
Cumo jobe oufecial de l 25 de Abril tenes que antender que fui l pobo que bos dou la fuorça i nun fui para meia dúzia mandáren. Naide pensou an squierda i dreita, pensou an Pertual i you sabie de todo muito antes i puodes quedar a saber que an Agosto de 1973 yá ne l Praino, cun grupo de oufeciales que stubírun na frente ne l die 25 de Abril, çcutimos l Stado Social, nó l stado duns poucos, 90% de ls jobes cumo tu, que partecipórun, nun éran de lado nanhun, éran por mudar, por dar la lhibardade. Agora ten que se ser solo dun lhado? La stória ha de fazer-se un die.
Firmino,
Cuntina a defender la lhebardade i la tue eideia, fui para esso l 25 de Abril, nó para ls oupurtunistas i que pássan l tiempo cun táticas politicas.
Ana,
!!!!
Cuido que l punto diç todo. Porquei?! Acrecento you...
Abraço
Almendra
Si pus fazei fazei tiu Almendra ! You'l que sei yê qu'un puliticu hai uns meses atras tubu l'eideya d'acabar cu'la RDPI an ondias curtas. Y'l resultadu yê que d'onte pra ca acaboren las eimissones an ondias curtas de la RDPI y agora ya nun puôdu scuitar la lliêngua purtuésa nal radiu !!!
Pus son tius assi que lus votus ponen a dumina'l peis !
Vos sabeis biên lu que dezie tiu Lérias; al miu votu naide lu meréce...
Si pus agora, an quantu y no, scuitu Radio Roménia International purque da un purgrama an purtués... Ay Ay !
Sabie que l miu géstio nun iba a ser popular i yá lo dixe.
Caro Jesé Almedra, se lires l miu cúrtio testo, berás que nun te acuso nien a Fir de nada, nien tenie esse dreito.
La berdade ye que poderiemos star eilhi a ampeçar ua 'scalada', puis l blogue ten muita giente a partecipar - i bien. La medida que tomei quijo ser subretodo prebentiba.
Nun fáltan sítios adonde falar de partidos, mas siempre neste blogue se falou de política, puis la política ten a ber cula bida.
L miu géstio fui transparente: assumido publicamente i splicado. Fui todo feito de modo claro i cun respeito pulas pessonas, cumo siempre se fizo neste blogue i assi cuntinará, i para esso nun percisamos de star todos de acordo. Siempre bibimos bien culas defrenças de oupenion i esso nun ye nanhun drama, bien al alrobés.
Nada desto ampide la total lhibardade de que este blogue ten proua, mas cun regras, i por esso stou cierto de que cuntinará a ser l grande blogue de ls mirandeses i de l mirandés.
Un abraço a todo mundo
Amadeu Ferreira
Amadeu,
ye perciso cuidado cun las palabras.
Ousastes bárias bezes la palabra "popular", que ye ua palabra que eisiste, pul menos an trés partidos portugueses.
Atentai, que l admnistrador de l blogue puode achar que ye porpaganda i apagar-bos ls comentários.
Conchu ! Pus que se torna a puné lus testus açpuis las eileiçones... y ala nada mas... hui pulitica pulitica...
Caro Amadeu,
Se you nun tubisse ningua cunsideraçon por bós, nunca mais falarie desto; cumo tengo, sinto necidade de tornar a este assunto.
Bós dezis que un blogue ten de tener regras. You cuncuordo. Quando me cumbidastes para screbir eiqui, splicastes-me las regras i you aceitei l buosso cumbite. NUNCA lo aceiterie, se me houbésseis dito que nun poderie screber sobre partidos an época de campanhas eleitorales ó noutra campanha qualquier.
Ye por esso que me siento oufendido cul buosso géstio. Bós dezis que l tomaste cun respeito por todo l mundo i acradito que fosse essa la buossa antençon, mas you acho que nun fui respeitado.
Ye que esso de mudar las regras a medio de l jogo, i mais a mais, cun efeitos retroatibos, ye algo que nun cunsigo aceitar.
Inda por riba, que sentido ten nun se poder falar de partidos por starmos an campanha eleitoral? Yá agora, nun quereis tamien proibir que se fale de santos populares durante l més de Junho? Se you houbesse lido la buossa tomada de posiçon dous meses mais cedo, pensarie que yera ua brincadeira de l purmeiro de Abril.
Dezis bós que l buosso géstio foi perbentibo. Mas perbentibo de quei? Que mal benerie al mundo se un outor de l froles decidisse apelar al boto nun determinado partido, cumo Tiégui apelou al boto an branco? Splicai-me!
Haberie quien nun cuncordasse? I nun hai siempre? Se you bos falar de la peça de triato que bi este fim de sumana, nun haberá quien nun guste de Pirandello? You adorei l post de Abélhon sobre Leonard Cohen, nun haberá quien nun guste? I apuis? Qual ye l porblema? Agora tenemos que gustar de todo i agradar a todos?
Nun tenemos todos mais de 18 anhos i capacidade para pensar pula nuossa cabeça? Afinal, teneis miedo de quei? Que la oupenion de uns quantos puossa ser antendida cumo la oupenion de l admnistrador de l blogue, que sodes bós? Para tal, bastaba un sclarecimiento de que ls outores sun respunsables (cumo siempre) pu ls sous testos i de que las oupeniones spressas nun representan qualquier "oupenion oufecial" de l blogue. Nun yera perciso censurar testo nanhun.
Andependientemente de l buosso géstio ser ó nun popular, l porblema ye que ye anjusto i arbitrairo. Se you tubisse, cunciente ó ancuncientemente, biolado algue regra de l blogue, la buossa atitude fazerie sentido i you yá saberie que me bondaba cumprir las regras de las próssimas bezes. Agora, nien sei l que screbir ne l blogue. Cumo posso saber que aqueilho que quiero screber nun bai ser apagado, por ua arbitrariedade qualquier ó por ua regra ambentada ne l momento, se l percedente fui criado? Ye que screbir inda me dá algun trabalho i gustaba de saber se esse trabalho bá-le la pena.
Cumprimentos,
F.
Ah Fir ! You quandu scribu naide me sabe ler, assi que me deixan screbi'l que you quiêru hi hi !
Vutar an brancu yê ua maneira de vutar, aende nun se fala n'un partidu.
Al mal yê quandu se pon dalgu de pulitica. Siêmpre puôde haber un que dira que liu al Froles Mirandésas y que daban ua ciêrta ourientaçon pulitica ou que falaban mal d'un partidu. Ou que yê un blog qu'anfluanciya la gente pra vutar n'un ciêrtu sentidu, ect...
Hai que s'anteirar d'aquessas cousas, you pensu qu'Amadeu pensou assi.
Tiégui,
- you nun bou seguir l tou cunseilho de botar an branco, mas defendo an absoluto l tou dreito de spremir la tue oupenion;
- por ua queston de coeréncie, tamien acho que qualquier pessoa debe tener l dreito de criticar, seia an sentido positibo ó negatiba, qualquier partido (nun falo de ataques pessonales, falo de eideias, de çcursos, de porgramas, de açones);
- aliás, la eideia de botar an branco traç amplícita la eideia de que ningun partido ye digno de l boto, l que nun deixa de ser ua crítica negatiba als partidos;
- To la giente que cunhece l Froles sabe que ye scrito por pessonas cun defrentes oupeniones (i nun apenas an relaçon a la política), sensibilidades i bibéncies; assí ye que ye guapo;
- Cumo ls outores stan eidenteficados (nien que seia por un nick, cumo ye l miu causo i l tou), nun se cunfunde la oupenion andebidual cun la oupenion de l "coletibo";
- Claro que puode haber l risco de alguien çcubrir hoije l froles, ler un testo ó dous i achar que ye la oupenion "ouficial" de l blogue; quein l antender assí, stá a antender mal i nun debemos cair na tentaçon de deixar de falar, solo porque alguien mos puode antender mal; esse camino ye miu peligroso
Un abraço i buona suorte pa la huorta,
F.
Al miu nome nun yê un ambentu hai mesmu quiên me chame assi y nun son poucus :)
Se nun creis vutar an brancu yê purque hai uns que gustais mas qu'outrus.
You cume nun gustu de ningun, votu brancu.
Catanu de la huôrta ! Adula ?! Nun la tengu, mas se teneis aende un partidu que me deya ua ya votu para él !
Mas cume nun lus hai, assi mus ficarémus ora si ?
Ah mi, tamien hai muito quien me chame Fir i hai muitos anhos :-)
Mira home, you tengo ua pequeinha huorta i nun sperei que ningun partido alhá fuosse fazi-la nien tratar deilha.
Un abraço.
Buonas Tardes Almendra,
Gustei mui de l tou testo. Ye ua fuorte berdade que “fui l pobo que mos dou fuorça…naide pensou an squierda i dreita, pensamos an Pertual…90% de ls jobes cumo you nun éran de lhado nanhun, éran por mudar, por tener lhibardade”.
L que mais me anfluenciou, fúrun ls (i las) colegas de las Faculdades cebiles que me falában na necidade de deixarmos d'apuntar las armas pa ls nuossas africanos (an Angola, Moçambique, Guiné,...) i birá-las pa ls que ne ls gobernában ne l Terreiro de l Paço, para cunquistarmos la lhibardade de pensamiento, la lhibardade de spresson, la lhibardade de scolha (botar) i todas las lhibardades qu'até hoije fúrun cunquistadas.
Bibir estas lhibardades, Almendra, ye para mi ser capaç de mudar, de participar ne l gobierno de l miu Paíç cul miu boto, na sperança d'ajudar a custruir un Pertual melhor. Por esso repito, naide debe deixar de botar.
Un abraço
Leonardo.
Anton Fir, pus ya védes ! Nun pecizais de pulitica, niên de puliticus pra nada !
Tiégui,
Perciso, por eisemplo, de políticos que garantan que las augas nun son pribatizadas i nun atinjan un précio tan eilebado que me oubrigue a zistir de la huorta. De l resto, cuido you.
Perciso de políticos que defendan ls miu dreito a trabalhar i ls mius dreitos anquanto trabalhador. Mas nun perciso de políticos que façan l trabalho por mi.
Un abraço,
F.
Fir i Tiégui,
Tamien tengo huorta i trato-la bien.
Perciso, por eisemplo, de políticos que garántan que las augas nun seran pribatizadas i nun atínjan un précio tan eilebado que me oubrigue a zistir de la huorta. De l resto, cuido you.
Perciso de políticos que deféndan ls miu dreito a trabalhar i ls mius dreitos anquanto trabalhador.
Mas nun perciso de políticos que fágan l trabalho por mi.
Nun quiero un partido que pague para nun trabalhar.
Nun quiero un partido que pensa que ye l stado an beç de pensar an admenistrar bien l stado.
Nun quiero un partido que dá todo als sous i nun deixa medrar ls outros.
Quiero politicos sérios i que dígan la berdade al pobo...
Abraço
Almendra
Hey pah! Se la pulitica fussa assi tan buôna !
"Quiero politicos sérios i que dígan la berdade al pobo..."
Dende cume nun lus hai, sigu pensandu na mesma !
Enviar um comentário