08/09/08

Ancarnaçon de l demonho




Acabou onte la segunda eidiçon de l Festibal de Cinema de Terror de Lisboua, l MotelX. You solo bi un filme, por acaso l terceiro filme dua trilogie de que nun bi ls dous prumeiros. Chama-se Encarnação do Demônio i ye un filme de l realisador brasileiro José Mojica Marins, que tamien anterpreta la personaige principal: Zé do Caixão.
Apuis de quarenta anhos preso, l assassino Zé do Caixão ye lhibartado, para zgusto de la polícia i de la populaçon de la fabela para adonde el bai morar. Reampeça anton la busca de la mulhier purfeita para girar l filho de Zé do Caixão, cun ua série de rituales sadomasoquistas, que acában quaije siempre na muorte de alguien.
Nun hai buonos i malos ne l sentido cumbencional de l termo, solo hai malos. Ls polícias que querien prender Zé do Caixão son capazes de matar a sangre friu las crianças probes de la fabela. Algues de las mulhieres bítimas de Zé do Caixão quieren ganhar fama de maneiras pouco éticas (la abogada defendiu l própio Zé do Caixão i la cientista querie colaborar cun el para zambolber spriéncias pouco éticas). L padre que l quier prender bibe adominado pula eideia de la bingança i nun se amporta de botar mano de magie de ls demonhos. A la outra, bemos algues fraquezas de l Zé do Caixão nas sues bisones i bemos que el nun ye malo de todo, quando salba ua criança de se morrer a las manos de la polícia.
La fin queda an abierto. Zé do Caixão muorre-se, mas deixa cinco mulhieres grábidas (será que algun filho cuntinará la sue obra?) i la pormessa de bolber zde l outro mundo.
L filme stá bien feito (para quien gusta de l género), mas a las bezes hai alguns zageros, que l fazen caier ne l redículo. Ua curjidade: l guion de l filme fui screbido hai quarenta anhos. Mas la rodaige foi bárias bezes adiada debido a cuntratiempos cumo la muorte de bários perdutores.



Sem comentários: