07/02/08

L'amportança de tener un títalo bien scolhido: Studo subre ls títalos lhargos i xatos aplicados nas teses de mestrados i doutoramientos



L outordie passei pula Faculdade i spreitei un pequeinho placard adonde stan puostas las datas de defénsia de teses de Mestrados i Doutoramientos. Tengo algue curjidade an ber ls alunos defender las teses, até porque un die talbeç chegue la mie beç de l fazer (yá tube más ganas, mas esso ye outra cuonta). Claro que las defesas anunciadas ne l placard yá stában zatualizadas, mas esso nun me spantou. L que me chamou l'atençon fúran ls títalos de las teses, todos mui lhargos (querie dar dous ó trés eisemplos, mas nun cunsigo lhembrar-me) i quaije todos mui xatos. Antrigado, pus-me a pensar se haberá algua rezon para esso.
La ounibersidade eisige als alunos que deféndan las sues teses an público, mas nun hai ne ls planos de curso, ningua çplina que ls purpare para falar an público. Portanto, talbeç seia ua eideia tener títalos xatos. L aluno entra, ls uolhos todos puostos nel i anton ampeça a falar: "La mie tese antitula-se...". Quando acaba de dezir l títalo, yá l público stá quaije todo a drumir i dende palantre ye más fácele cuntinar. Ye un bun truco.
Outra rezon talbeç seia que muitos académicos cunsídren que un títalo pequeinho, direto i cun segnificado ye un títalo anferior. Ye possible. You yá cumbersei cun muitos porsores para quien todo l que nun seia de la sue specialidade ye anferior. I anton, se fur minimamente apelatibo a las "massas", nun ye digno de ser studado nua ounibersidade.


1 comentário:

Tiégui disse...

Buônas nuites,
héhé acho qu'ende si puôdo respunder algo suôbre aquisso de los doutouramientos.

Al que you tengo pra fazer chama-s'assi (nun yê que se puôda chamar purque nun yê un ser bibo, mas anfin yê l sou nome) :
"Zbulbimiênto d'antenas pa la rede BAN i studio statisco de los canales de propagacion nal cuôrpo humano i antre cuôrpo humano i l sterior". (Ya ls bie piores y mas longos héhé)

Cun BAN hai qu'antander "Body Array Network" ou seia rede de cumenicaçones nal cuôrpo. I cun sterior hai qu'antander "fuôra dal cuôrpo".

Al canal de propagacion yê l meio adonde las ondias de radio andan.

Pur eisemplo andamos a studar las pussebilidades de puner ua antena nua pilha (pacemaker) que puôda cumenicar cul terfone de la pessona. Assi se la pessona s'acha mal dal curaçon la pilha manda un sinal pal terfone para chamar los bumbeiros.

Bon isso yê un uso, mas hai mas cousas que se puôdan fazer.

Yê berdade que nun tenemos cursos pra mos purparar-mos a la çfesa dal nuôsso trabalho mas durante los trés anhos (ou mas de trabalho) fazemos muitas cunferencias i muitas an Einglés.
Nos, los de l'eiltronica usamos muito l'Einglés yê lhiêngua oufecial nessa ciencia :-)

Assi que la purmeira beç que se fai isso (nurmalmiênte nal purmeiro anho) yê l berdadeiro test y bei-se lhougo s'un yê capaç de falar noutra lhiêngua an frente de 300 pessonas sien se scangalhar todo.

You inda nun passei pur isso, las mies calças inda stan secas héhé

Abraço.