Ls casamientos que you conheço son ls que se fazien an Sendin, cun rapazes ne ls quatros puntos de l pobo, cada un cun un ambude.
AF]
yá se fui l die
todo mundo drume
sultai la magie.
Bamos a casar
a cruzar çtinos
streilhas a brilhar
ban a ser padrinos.
- Camarada! Camarada alerta!
Ehhhhh!
- Alerta stá! Camarada alerta!
Ehhhhh!
- Cuitado d’Antonho ciego
cun quien l bamos a casar?
Ohhhhhh!
- Bai a ser cun Marie manca.
- Camarada tan dariego
que dote le quieres dar?
- Ua pita bielha i manca
mais ua puorta sin tranca.
- EEEEEH! EEEEEH!
Yá nun arde l lhume
yá se fui l die
todo mundo drume
sultai la magie.
Bamos a casar
a cruzar çtinos
streilhas a brilhar
ban a ser padrinos.
- Camarada! Camarada alerta!
Ehhhhh!
- Alerta stá! Camarada alerta!
Ehhhhh!
- I la mais bielha sulteira
que stá chena de ferruge?
Ohhhhhh!
- Casamos-la cul ferreiro,
marchácan la nuite anteira.
- I dás-le dote que ruge?
- Cumo nun sou antresseiro
dou-le baras pa l fumeiro.
- EEEEEH! EEEEEH!
Yá nun arde l lhume
yá se fui l die
todo mundo drume
sultai la magie.
Bamos a casar
a cruzar çtinos
streilhas a brilhar
ban a ser padrinos.
- Camarada! Camarada alerta!
Ehhhhh!
- Alerta stá! Camarada alerta!
Ehhhhh!
- A quien mais botas l lhaço?
- Pus, al burro de tiu Gorja.
Ohhhhh!
- Par’esse tengo ua burra
que de bé-la dá cagaço!
- Dou-le de dote ua alforja
bás a ber cum’el le zurra
bás a ber cum’eilha zurra!
- EEEEEH! EEEEEH!
Fracisco Niebro
(2004)
5 comentários:
De certeza que tenemos aqui la letra dua moda que só puode benir a ser un sucesso planetário. Que ye que stan a fazer « Ls Arzinales » ?!!!!!
You inda cunhecie Maria Manquita, se ye la mesma pessona de que fala neste testo, Amadeu…
Ua questureira que moraba ne l fundo de la rue de l Baiunco, nun ye berdade… ?
Se fur eilha, que ne l cielo steia eimaginando tamien que música podie acumpanhar essa letra, eilha que nunca chegou a casar se bien me lhembro, ou assistindo cun muitos outros de la sue aldé i de la sue tierra, ne l Sagrado, an Sendin, por eisemplo, a ua quemédia… toda falada an Mirandés i para se scachar de rir ! Ou até a las dues cousas al mesmo tiempo : ua quemédia cun modas tamien.
Oubrigada Amadeu !
Inda subre ls casamientos na mie tierra.
Cumo bos dixe siempre you an muita cousa scapei-me bien nuobo d'alhá (cun 16 anhos d'eidade).
Assi sendo la redadeira beç que fui casado fui cun 15 anhos. I l pouco que me lhembro ye que ua quadrilha de rapazes (mocidade) poniesse siempre de l lhado de las Medianas i l outro, íba-se para la cortina de l Castanheiro que queda de l outro lhado.
Ua de la cundiçones deste grupo era nun deixar sacapar nada anté la nuite de ls casamientos.
Ampeçaba ua a boziar cula ajuda dun almude (ou un cantaro de lhata sien culo, aqueilha cousa que se ponie para anchir las cubas), desse modo l bózio tenie mais sonido, mais eco na nuite.
I dezie la purmeira quadrilha para to l'aldé oubir
- Alhá bai un...
Respundie l'outra
- Quien mos mandais agora.
Apuis la purmeia
- Ye Jesé Caiatas...
- Cun quien la casamos...
- Un Marie Manca...
- ................
- ................
I assi se casában las fuontes culs chafarizes, las cruzes culs cruzeiros, las burras culs burros ls machos culas mulas, las solteiras, culs solteiros, las rapazas culs rapazes, todo l que fusse solteiro.
Cumo nunca fiç parte dessa quadrilha por ser nuobo, nada sei cumo esso se fazie.
Se un die l benir a saber cunto-lo.
Obs: Para melhor antender quiero dezir-bos que l'aldé de Zenizio queda antriçada antre dues ancuostas (colinas) por isso se diç que ye tan guapa cumo las Rainhas.
Las mies çculpas
Adonde digo almude, quiero dezir ambude
Buonas nuites Ana,
Mira, Ls Arzinales ténen-se dado a la malandra i ye ua pena.
Lembra-se-me bien de tie Marie Manquita, mas nun era neilha que you staba a pensar. Mas la cousa nun quedaba mal, yá que era solteira.
Era you garoto i quedaba spierto na cama a oubir ls casamientos. Nun antendie grande cousa, mas solo de oubir las bozes yá era ua alegrie.
Amadeu
Buonas nuites Faustino,
Ls casamientos de l Antruido son defrentes de tierra para tierra, mas la eideia ye la mesma, i até la forma de fazer las cousas. Éran momientos de crítica social, que ua giente gustaba i outra nó.
You tamien nunca partecipei ne ls casamientos, de modo que l que sei ye de haber oubido quando era garotico.
Hai tierras adonde cuido que inda se fázen i que todos ls anhos noméian un juiç i outros assi para ouganizar la cousa, cun bersos de crítica social mui fuorte, uns por uas rezones i outros por outras.
Essa de Zenízio ser ua Rainha antre dous cabeços nun la sabie.
Un abraço,
Amadeu
Enviar um comentário