Cuonta - L'ampeço dua tradiçon que se manten

Naide puode dezir se fui assi q’acunteciu, se era assi que se fazien las cousas, porque nun hai naide que l puoda cunfirmar, porque yá quantá que ls Reis nun mándan na Nacion.

Fui assi que la oubie cuntar, ye assi que bos la cunto.

 - Dezírun-me q’hai muitos muitos anhos, quando ls Reis mandában, se calha fui Don Çáncio I, “l poboador” , de quien Bergança ten buonas lhembranças, puis sou pai Don Fonso I nun tenie bagar de s’ambaiar a mirar pa las cidades, porque andaba a porraba culs bezinos.

Houbo un, ne ls percípios de l més de Dezembre, quando s’assomou a ua de las barandas de sou castielho para ber cumo staba la nuite, quedou mui triste porque staba mui scuro.

-Chamou l purmeiro ministro de la Nacion – puis nesse tiempo inda l podie fazer – i ordenou que antes de l Natal querie ber la cidade toda alhumbrada, cun fogueiras, archotes, belas i l demais que alhumbrasse.

I dixo-le:

- Eiqui tenes quenhientos mil cruzados para çtribuir i trata yá de resolber l problema que a mi me da muita tristeza esta scuridon.

  L purmeiro ministro chamou l mandon de la cidade i dixo-le:

- L nuosso Rei quier ber la cidade toda alhumbrada antes de l die de Natal. Toma duzientos i cinquenta mil cruzados para çtribuires i trata de resolber l problema.

  l mandon de la cidade delantre de tal orde benida de l Rei, nun tubo outro remédio se nó chamar l xefe de la Guarda. A quien ordenou:

- L nuosso Rei quier la cidade toda alhumbrada anté l Natal. Tenes eiqui cien mil cruzados i trata de resolber l problema.

L xefe de la Guarda, nun perdiu tiempo i botou eiditales an to ls terreiros de la cidade, que dezie:

“Por orde de l Senhor Rei, an todas las rues i casas debe ser puosta eiluminaçon anté l die de Natal. Quien nun l fazir,  zoubedecir a esta orde será anforcado”

Passado que fúrun uns dies, l Rei de la Nacion bieno a ua de las barandas de l sou castielho – que tenie muitas – i quando biu la sue cidade toda alhumbrada, sclamou de cuntentamento:

 - Que guapo!

Abençonado denheiro que gastei. Baliu la pena.

You ancerro esta cuonta de l mesmo modo que l’ampecei.

You nun sei se la tradiçon de las lhuzes de l Natal ampeçou assi, nien se ye questume cuntinar a fazer las cousas deste modo.

S’alguien que lir tamien nun l soubir nun fai mal, nun quede anraibado.

Hai cousas que ye melhor que nun sábamos l’ampeço, nien sequiera s’inda ye tradiçon.

Faustino Antão

-Tamien fui publicada na "Fuolha Mirandesa" de l Jornal Nordeste, eidicon nº1157 de 15 de Janeiro de 2019