Home de baixa statura, l sou porte nun íba pa riba de l
lhombo de l “listo” que era mais
taludo que la “torquesa”, quando le ponie la albarda.
Ralas éran las bezes que nun tiraba la pareilha de l
corteilho, mas desta beç íba a lhebar só l burro, puis, la jornada era taluda i
lhebar ls dous só ampatában. Ampatar-se pul caminho era cousa que nun podie, se
quejisse chegar a horas de la porciçon, era caminho que nun le metie miedo, yá
l habie feito muitas bezes pula temporada de la apanha de las azeitonas, na
tierra del nun habie oulibales, i para adonde íba éran l ouro. Mas isso fui
noutro tiempo, era nuobo, tenie salude i cun eilha outro galho canta.
Esta jornada a San Burtelameu, tenie outro perpósito, era ua
pormessa que Florindico habie feito, isto de pormessas apuis de feitas ye
melhor pagar-las, quien nun fur de buonas cuntas ye melhor nun las fazer. Que
nun era l causo, el si se sentie melhor, aqueilhes pantasmas i bózios qu’oubie,
sien saber s’éran deste ou de l outro mundo, habien zaparcido, i s´habie pedido
l'anterbençon de l Santo, anton nun habie que tener dúbedas, staba curado. I
que raio, la pormessa até nien era mala de pagar, fazer la buolta de la porciçon
de bela acessa, i quedarie culas cuntas saldadas até l juízo final.
Madrugou, mais que madrugou, pul ampeço de la madrugada yá
el lhebaba un bun rato de caminho, habie que bençir lhadeiras i cabeços i l
praino mirandés yá quedaba bien para trás, por caleijas, caminos i atalhos de l termo de Bumioso,
cunfiaba an “listo”, que nunca s’habie negado, meigo i antruncado, habie de ser
la certeza de l lhebar i traier.
Florindico, nun era mui dado a biaijes, se las fazie era porque
la bida assi l eisejie, i esto de se botar a caminho temprano, traie-le sempre
cobradeiros de cabeça, sien acunhar uolho, botou manos dun muordo de pan i ala
que se fai tarde, que de buida habie de botar ls queixos nas fuontes que stan
sparbadas pula ruta, até alhá. (Cuntina)
Sem comentários:
Enviar um comentário