Salimiento de mais un lhibro na CTMAD

La casa de “Trás-os-Montes e Alto Douro, CTMAD” mais ua beç, cumo siempre l ten feito al lhargo de la sue stória centenaira, abriu las puortas.

Nesta bocaçon plural, la CTMAD par'alhá de pormober l associatibismo, eibentos i atebidades  de carátele regional, dada la sue bocaçon cumo anstituiçon cun nome, nunca perdiu nien perde l norte quando toca a ambestir na bertente cultural de la scrita e publicaçones.

Desta beç, ne l die 28 de nobembre, sábado passado, a la tarde fui la beç de pormober l salimiento de l lhibro “O Medronho; L Madronho; El Madroño, ponto por ponto” an trés lhénguas, pertués, mirandés i castelhano. D’outorie de la Drª Manuela Barros Ferreira, persona eilustre e tan conhecida pula quemunidade mirandesa, pula sue anterbençon decisiba n’oufecializaçon da la lhéngua, aquando la sue oufecializaçon que la tornou an mais ua lhéngua oufecial de Pertual. Cula traduçon para mirandés pul porsor, ambertigador, tradutor, scritor, mestre, Drº Amadeu Ferreira, que cumo to l mundo sabe s’antregou de coraçon i alma a la dibulgaçon, ansino, ambestigaçon e scrita de l mirandés, nua andada de paixon, dando las sues upas an todo l que fusse para alhebantar la fala i la scrita deste patrimonho lhénguistico. I Karim Taylharde Garcés pula traduçon an castelhano, persona de quien nun puodo dezir algue puis nun l coinheço, nien sous feitos, mas ten-los cun certeza.

Lhibro que als nuossos uolhos s’apresenta pequeinho, bira grande quando lemos la cunta, biramos las fuolhas i quedamos atentos als queloridos zeinhos. Bira grande porque ponendo las trés lhénguas a la par, dá la possiblidade de chegar loinge, a muita giente i na lheitura i anterpretaçon de la cuonta ancuntrar puontos d’ancuontro de la magie de la scrita i la mensaige de l’outora.

Hai que ler-lo, ye a miu ber ua pequeinha cuonta que nun çpensa la sue lheitura, nun puode quedar ne l domínio de l que me cuntórun. Naide ye capaç de nua pequeinha crónica ou palabras, passar l sentimento, entrega e dedicaçon que fui eiqui botada pula sue outora.

L’assemblé, par’alhá de l salimeinto, fui tamien un grande cumbíbio i momiento de buona çposiçon cun todas las anterbençones, que ye l que se quier, i quando assi ye to l mundo queda mais sclarecido, mais rico.

Nunca ye de mais agradecer i dezir oubrigado, a l’outora Drª Manuela Barros Ferreira, als familiares de l Drº Amadeu ferreira, a todos i todas aqueilhes que trabalhórun, eilustraçon, paginaçon, grafismo, a l’eiditora, als repunsables de la CTMAD, an special a la repunsable pula área cultural, por mos cuntemplar cun mais este eibento.

Bien háiades i mais ua beç muito oubrigado