Las tradiçõnes an Zenízio……..(n’aldé i fuora)…

 

           

Dezie un miu cunterráneo i pariente quando ponie uns retraticos de la fogueira de cepos i l pobo alredror ne l facebook que  “las tradiçones an Zenízio inda son l que éran”.

Ye guapo, i deixamos a todos babados i prouistas,  ls mius parabienes a todo esse pobo que nun deixa caier ne l squecimiento ua tradiçon secular, porque esta tradiçon de l “Dous de Febreiro” na nuossa aldé (Zenízio) ten, siempre tubo i cuntina a tener ua lhigaçon a las giente i stá tan agarrada a todos que muita giente neste die spargida pul mundo fai ancuontros i ajuntouros.

L causo que mais se çtaca, cuido you,  fuora de l’aldé ye l que fai l’Associaçon Cultural i Recreativa Nial de la Boubielha, que ye cumpuosta puls cunterráneos, sous familiares i amigos a bibir an Lisboua i alredores.

Que tamien fizo la fiesta, que celebrou l “Dous de Febreiro” (die de Nuossa Senhora de las Candeias) pormobendo ua missa adonde todos an quemunhon culas nuossas debuçones a la Birge Mai i Santa, cun fé relhembremos todos als cunterráneos que yá mos deixórun puls lheis naturales de la bida, celebrada pul cura António Morais ( nacido an  Bila Chana de Barciosa), culas lheituras an mirandés, nuossa lhéngua d’ourige, un almuorço de cumbíbio pula tarde afuora, an partilha i camaradaige.

Ye bien berdade caros cunterráneos d’alhá i d’acá las tradiçones inda son l que éran, son cumo siempre fúrun dantes, cachicos chenos d’alegrie, momientos de cumbíbio, adonde alredror de ls cepos ardendo mirabamos las lhabaredas, ls stouros botando chiçpas pa l cielo. Tamien essas tradiçones agora cuntínan a tener essa fuorça i funçon de mos ounir, de mos ajuntar, i neste tiempo que cuorre cua mecha de ls diabros i todo se bai nun sfregante, que bola, son estas tradiçones que inda ténen essa birtude de mos fazer parar i relhembrar l que tenie de buono un die de nomeada. Quando bibimos tiempos cumo ls d’agora, agarrados a las nuobas tecnologies, an que parece que todo stá acerca, mas nun stá, son estes cachicos d’ouro ls repunsables por mos fazer chegar de nuobo ls afetos, las falas, que solo se mistúran quando hai dies assi i pessonas a trabalhar para nun ls deixar morrer-se.

You nestes dies sou mui fraco, tengo l coraçon atrecido i debedido an dous, querie star alhá, mas stube an Lisboua, fui cumo siempre ten sido, la quemunidade stubo persente an fuorça, ounida i feliç, esta direcion de l’Associaçon, l nuosso stimado i cunterráneo cura, i demais associados que trabalhórun para que l eibento tubisse eisito, stubírun ne l caminho cierto.

I a cerrar esta pequeinha crónica quiero dezir a to l mundo, felizes aqueilhes que tenemos inda todo este patrimonho houmano que cada beç mos dá mais muostras de grandura, este patrimonho cultural sano, lhimpo i rico, porque apuis de torcer todo l munton de cousas de que ye feita la bida, l que sobra son na berdade estes balores i la calor de ls afetos, de la família i de la quemunidade.

(Faustino Antão)