Por uma bida melhor

Este retrato yá se tornou célebre. Fui tirado, este e outros que hoije tamien puoden ser bistos (antre outros sítios) ne l Museu de l’Eimigraçon que fui criado an Paris hai uns anhos, por Gérald Bloncourt, un haiciano que cumbibiu muito ne ls anhos 60 cun eimigrantes pertueses anstalados nessa altura nun de ls maiores bairros de lhata que chegou a haber an França zde siempre, an Champigny-sur-Marne eisatamiente ne ls arredores de Paris,  cumo tamien Nanterre ou an Saint-Denis por eisemplo.   A mi chama-me muito l’atençon esse retrato porque tamien you fui ua garotica cun seis ou siete anhos cumo la que se bei na eimaige, nesses anhos 60 an que houbo milhares de Pertueses que eimigrórun i scolhírun la França cumo destino l mais de las bezes. Tamien you cheguei a tener, cumo eilha, ua boneca parecida cun essa que la rapazica guarda bien agarrada a eilha nun xalico cumo para quedáren dambas a dues mais calenticas; i talbeç cumo eilha tamien tubisse gustado de ser retratada cun esse tesouro que puode repersentar ua boneca para rapazicas daqueilha eidade, mesmo alhi, ne l meio de toda essa lama i de simpres barracas feitas cul que habie ou que ls homes aporbeitában ne ls « chantiers » adonde quaije todos trabalhában cumo pedreiros :  alguns palos, placas de zinco, cachos de plástico ou de carton, alguas telhas i tijolos…

Feliçmente, tube la suorte de nunca irmos parar nun sítio cumo esse, an cundiçones tan defíceles i ne l meio de tanta ansalubridade. Mas fui an Sendin, curjidosamiente, ne ls anhos 70, mesmo depuis de l 25 de Abril, talbeç ne l Ambierno de 1975 ou 1976 an que tubo l’oucasion de ir a passar alhá uns dies de férias (tenie anton uns 14 ou 15 anhos) que me lhembro - i por esso quedei mui ampressionada mas triste tamien al mesmo tiempo - de ber mais lhama que eu sei alhá nas rues, cumo por eisemplo na rue adonde you naci i que hoije se chama la rue 1° de maio. Inda l saneamiento nun habie chegado a ser feito corretamiente i habie quien inda aporbeitasse la lhama i l’auga que habie nas rues para poner anriba camadas de tomilho i fazer stierco cumo me splicórun na altura. Só cun botas ye que un podie andar nessas rues que mais se parecien finalmente cun essa mesma que se bei ne l retrato tirado por  Gérald Bloncourt… cumo se Sendin fusse tamien na altura un grande bairro de lhata!… Sendin cumo tamien muitas outras aldés de las tierras de Miranda ou de muitos outros sítios an Pertual na altura, quier dezir : yá depuis de ls anhos 60 (yá fazie 10 anhos que nós yá stábamos an França!) mas yá quaije tamien quando stábamos a chegar als anhos 80 ! Yá nun era sien tiempo anton que muitas cousas ampeçássen a mudar !