Spera-te...

Fuste-te...
Cumo se furas
Un cabalho de corrida
An arenas sien fin
A buscar bitórias.

A galope perdiste-te
Caminando por touçones
Adonde nun tenies aldaba
Para prender mimórias.

Camina…
Agarrada a tous braços
A que un die se sigurou
Para remar an remolinos
I an tous beisos se afundou.

Spera-te...
Ne l puial de la canseira
Sigurando nas manos
Ls suonhos que remendou.

Spera-te...
Nas scaleiras de l´alma
Para que scaleira a scaleira
Báias chubindo
An chubida berdadeira.

Nun te ambaias
Cun l´auga
Que se scapou
Debagarico
De l´augueira.

Spera-te...
Nun naciente a berbulhar.