09/02/10

L Rato Cabreira i la strada

You sou un guapo ratico
Que me chaman Cabreira
Yá muitá que eiqui bibo
Sou l duonho desta lhadeira.


Por isso, you sou l rato cabreira
Nun hai outro cumo you
Se te deixo passar porqui
Para adonde ye que bou you.


Non, eiqui nun passas
Eiqui quien manda sou you
Tengo eiqui la mie casa
Yá muitá, que you eiqui stou.


Yá muitos anhos que bibo
Eiqui desta maneira
Se quejieres ir pra Bergáncia
Bai, por outro lhado de la lhadeira.


Ai! Miu Dius nuosso senhor
Yá me stou you agoniar
Que fago cul rato cabreira
Que nun me deixa passar.


Zbia-te ratico guapo
Nun te quiero ancomodar
Mas zbia-te mas a baixo
Para you puoder passar.


Zbia-te só uns dies
Anquanto me pónen a andar
Depuis queda tranquilo
Que yá te mando chamar.


Zbia-te mais abaixo un cachico
Ô mais arriba, se preferires
Cun trato que te zbies
Bai para adonde tu quejires.


Non, non, yá dixe
I assunto arrumado
Se quejires ir para Outeiro
Tenes que ir por outro lado.


Adonde ye que yá se biu!
Bai por outro lhado, mas ye
You deiqui nun me zbio
Esta lhadeira ye mie.


Queda mais cerca porqui
Ye un passico a Outeiro
Mas para alhá you chegar
Tenes que te zbiar purmeiro.


Yá stou, a quedar farta
Deste rato, i de las promessas
Anda zbia-te yá pouquito
You nun quiero que zapareças.


Mas la culpa nun ye tue
Tu nien chequiera eisistes
Para nun me fázeren a mi(n)
Fázen estas cenas tristes.


Fázemos-te ua casa nuoba
Para ti rato cabreira
Inda mas guapa que esta
Mas noutro sitio de la lhadeira.


Sós un rato teimoso
Cousa assi nunca you bi
Tira-te mas ye, yá delantre
Se nó passo porriba de ti.


José António Esteves

3 comentários:

franciscobelharino disse...

Buonas tardes Jesé Antonho,
Este ratico cabreira si dou bien jeito als políticos. Assi bai passando l tiempo, l denheiro que nun ye muito bai sendo zbiado pa outro lhado adonde hai mais giente a botar i ls que ban de Miranda pa Bergáncia i al cuntrairo cuntinan a fazer la strada ruin i a lhebar muito tiempo de camino.
Ls tius ambientalistas a las bezes fáien un fabores als políticos i fui l que aconteciu desta beç cul rato cabreira.

San Martino disse...

ls ratos yá aparecírun noutro sitio(mogadouro) i sabeis cumo resolbírun l porblema:
posírun las maquinas a trabalhar i eilhes fúrun para outro sitio.
soluçon de ls ambientalistas.
esto nun ye a gosar ye la berdade.

José Esteves disse...

Buonas tardes pa ls dous. Se fússe you a mandar por alguns tiempos, ibades a ber para adonde iba l rato cabreira. «You digo que era bergonhoso se houbisse berganha.»
Talbeç haba algun rato mesmo sien ser cabreira, que l dá mais jeito que nun se faga la strada, seia pul que seia algun antresse hai nisso.
I ls politicos que siempre furan zarolhos, só béien l que quieren ber.
I agora quieren ber l rato cabreira

Muito salude para bós.

Abraços
José António Esteves