Ua ajuda ye l que stou pedindo, porque apuis de saber l nome yá nun me bou a squecir.
Porsores, Amadeu, Ana Marie i lheitores que l sában, ajudai-me a saber cumo se chama esta frol. Saquei ls retratos l berano passado, na Barreira (Zenízio) na lhata de miu pariente, tiu Abel. Adonde el bai amanhando uas lheiras, nun s’amporta que you por ende bagamunde, i assi fui. Mas çcunfio que tube suorte porque la purmabera yá iba loinje i eilha solo se quedou por ende porque la tierra staba amanhada, quedou assi a modo spirolhando i fugindo a las çachadelas que l ourtelano daba nas demais yerbas brabas.
Mas que ye guapa ye, i cumoquiera s’afai por todo l lhado sien que se le dé muito cuidado.
4 comentários:
Nun mos diga que nun sabe, Sr Faustino !
Anton nun ye la malba ?
Ye ua de las plantas que mie mai, yá an Sendin, outilizaba para fazer chás. Diç eilha que puode ajudar a curar ciertas maleitas cumo la laringite, brunquite, delores de garganta, tosse, etc.
Quanto a bagabundear por entre las lheiras dessas tierras mirandesas, de Zenízio por eisemplo, faç-me pensar nun scritor, botanista i tamien filósofo célebre de l final de l seclo XVIII, filósofo de las Luzes, que fazie la mesma cousa. Chamaba-se Jean-Jacques Rousseau.
Saudaçones.
Oulá Ana Marie
Oubrigado, mas cuido que nun ye, assi i todo de la çcuçon se fai lhuç, mas cumo bos digo, inda bou a spiolhar puls mius retraticos para acumparar culas malbas, quessas si ten essas birtudes que dezis.
La mie tie sabe de todo esso puis ye eilha que quaije siempre fai ls chás.
Tamien amentais ende nun eilustre filósofo, i teneis rezon, que you solo oubi falar del de fugida quando fiç l Liceu (Curso Cump. de l Liceu).
Ides a perdonar-me mas queda-me mal l Sr atrás de l nome, you sei que nun l fazeis por mal, mas cumo yá bos dixe un die, que sien bos conhecer yá sodes bien famíliar.
I mais ua beç quedo agradecido pulas upas que me dais ne ls buossos comentairos
Saludos tamien para bós i ls buossos
Faustino,
Ana ten rezon - Oulá Ana! -, ess yerba ye ua malba, essa mesma de malzina, que até sirbe para fazer auga de malbas, buona antre outras cousas pa las almorródias.
Hai muitas bariadades de malbas, i essa será talbeç la que ye coincida por «malva sylvetris».
Ls retratos que tireste, Faustino, nun son mui claros, tamien la tierra nun parece ser la melhor para las malbas se criáren bien. Mas son eilhas, cuido you.
Abraço,
Oulá Amigos
Anton ye ua dessas muitas bariadadesde de malbas. Cumo dezie Ana i agora Amadeu (malba sylvetris).
Yá la bou a registrar ne l miu fexeiro de froles, cuitada staba sien nome, i you nun me bou a squecir.
Se nun l lhebardes a mal cun outras froles que tamien nun seia capaç d'eidentificar puodo poner assi a modo de çecuon!?
Saludos para todos
Enviar um comentário