Ls dies de la semana... tamien an mirandés

Mais ua proba que l mirandés stá a quedar ua lhéngua cada beç mais amportante:

Na wikipédia an pertués  BER AQUI, a perpósito de l’ourige de l nome de ls dies de la semana na lhéngua de Camões, podemos ler esto, por eisemplo acerca de l nome “quarta-feira”:

 " A palavra é originária do latim Quarta Feria, que significa "quarta feira", e de mesma acepção existe em galego (cuarta feira), mirandês (quarta) e tétum (loron-kuarta).  "

Quien nun speraba ber esta andicaçon sobre la maneira cumo se diç la palabra tamien an mirandés fui you... i pensei: “Stás a ber! I tu inda a pensar que l mirandés nun antressa assi tanto! Tenes mais ua proba que t'anganhas i que la lhéngua de ls tous pais i de ls tous antepassados inda ten muito que se le diga! A ber anton se te lhembras!   

... Hoije i tamien manhana, depuis de manhana, i ls outros dies tamien ! "

La cuonta – Esta fui-me cuntada……

 

Por altura de l Festibal Intercéltico de Sendin d’astanho (agosto de 2013) nua de las atebidades culturales, merquei alguns lhibros, cumo ye miu questume, gusto de lhibros, hoije tenemos an casa, porque la mie m’armana, ua buona biblioteca, la mie spráncia ye deixar-la al miu nieto assi el seia amigo ler.

Todo esto para dezir que un deilhes ye l “Pairavam Abutres nas Arribas” de Mário Correia, que li an dou cachos de tarde, talbeç porque l mote de la guerra cebil spanhola quel tan bieen trata siempre m’anterressou muito, you naci uns anhos apuis, mas inda porqui andaba l oulor a polbora, caíu-me mesmo bien la lheitura deste lhibro. 

Ancuntrei nel ua scrita fácele, bien trabalhada, familiar que muito m’anchiu (nun stou a fazer ua crítica lhiteraira, porque nun tengo saber para tal, stou a dezir que gustei i porquei). L que tento dezir ye que gustei de todo, ls teçtemunhos, cumo son cuntados, ls lhocales, las lhigaçones a las personaiges que le dan bida, i conheço todo adonde se passou. Sei que esses éran ls modos cumo las anstituiçones de l stado fazie las cousas, i tamien sei qu'esses modos metírun grima i spargírun amedrocamiento que lhebou anhos a zaparcer.

I, ne l correr de la leitura bieno-me a la lhémbrançia ua cuonta que me cuntórun, que you yá bárias bezes s’antolhou cuntar, i quien me la cuntou dezie que se passou durante la guerra cebil spanhola, you nun l fazie porque tenie que screbir palabrones, falar cousas que puoden oufender, nun ser de l agrado de todos i de todas, you inda sou de ls que ténen cumo mote “respeita para ser respeitado”.

Mas desta beç bai, ua tie fui agarrada pula polícia spanhola an Spanha a bender l cuorpo, cuitada a fazer pula bida. Cumo la polícia spanhola, nun adaba muito abonada de trocos (pesetas), resolbiu-se ambiar un telegrama a la sue congénita de Pertual, adonde dezie P.P.P.P.P.P.P., chegado a la polícia de pertual i çifrada, esta respondiu-le P.P..

 I todo quedou an bien, ye causo para dezir, mulhier para que te fuoste pa las tierras de ls reis católicos.

 

Tamien se puode ber que se la polícia spanhola andaba mal de trocos la polícia pertuesa nun andaba melhor, esta inda fui mais forreta, cun dous Pes resolbiu l porblema.

A la fin, cumo se puode ber nessa era ls d’acá solo nun stában matando, mas antregában-los para que ls outros l fazissen, se nun querien ls fugidos eilhes tamien nun querien ls nuossos i las nuosssas, passados anhos (an 1966) you trabalhei clandestino alhá i tamien tenie miedo de ser antregue na raia a la polícia pertuesa (yá stabamos cula guerra nas colónias).

(P.P.P.P.P.P.P. = Probre, Puta, Pertuesa, Pide, Passaige, Para, Pertual)

(P.P. = Puode Passar)

Alacraus

A la cunta de l nieto dun bezino que le gusta muito bichos, (an special daqueilhes que son mui stranhos, cumo fura-fenos, aranhones, alacraus, lagartos ….) astanho tenie cumo cumpormisso quando fusse a Zenízio traier-le un alacrau.

Cumo pedido de nieto, seia de l miu quier seia de ls mius amigos, ye ua orde, assi fiç, un die a la tarde, mesmo ne l rechico botei-me a caras al Barrocal, porque siempre me lhembro de ls ber porqui, até la Caleija Ancha, inda ba que nun ba, habie las selombras de ls freznos, mas apuis na ancuosta i ne l cabeço fui un martírio, un birar de piedras i calhaus, xeixos, lhajas i nien seinhas nien buraquito de tales bichos.

 Cumoquiera esta spécie yá s’acabou porqui, nun rejistiu al abandono (mas n’oupenion de ls que acá stan, ye que si ls hai, até me dezírun que ne l barrocal de Bilasseco era mais que cierto ancuntra-los).

Que an Lisboua hai muitos (stan nas bielhas madrigueiras, ancobados ne ls casarius de l Terreiro do Passo) esso sei-lo you, nun son bien alacraus, son assi a modos, mas pícan i pícan, dan ferronadas de muorte, que l dígan ls zampregados, anfermeiros, porsores, sriban, studantes, aposentados i muito outros deste paiç. 

Mas cumo las cousas son, quando era garroto, hai cinquenta anhos datrás, un pedido destes i you arranjaba ua cerronada deilhes, de ls berdadeiros, daqueilhes que alçában l rabo i nun stában cun meias medidas, ferronában an nós i na cria.

 Ls tiempos son outros, nun hai que lhamuriar, alhá andube ua tarde toda, dei buoltas i buoltas por todo aquel cabeço cheno de touças i fragas i nun bi nien rastro de tales bichos.

 Sobrou-me un munton de alhembráncias, que nestes momientos bénen al de riba, momientos que eiqui passei, cula cria ou cul ganado, solo ou cula joldra que eiqui s’ajuntaba, saquei alguns retratos a la celebre fraga (lhaja, nós an Zenízio dezimos fraga), porque era conhecida de todos, la fraga de l scorregadeiro, mas desta un die destes falarei, i assi tornei a casa sien alacrau.

I cun muita pena mie alhá tube que dezir al rapaç que nun ancuntrei nanhun alacrau, l que nun ye buono, puis ls rapazes d’hoije i de siempre, spéran de nós, ls mais crecidos, que yá somos  giente feita, cun spriéncia de bida que resolbamos ls problemas i quando nun l fazemos ye ua ziluson.

Nota: Barrocal, Caleija Ancha, son chamadeiros

Medra la bioléncia – será?

Porque será que a las bezes sentimos que la berdade nun ye la melhor seluçon? Porque será que ye mui fácele amanhar la berdade a nuosso gusto, al nuosso modo, feitiu ou oupenion? Porque será que cada beç mais çfarçamos para apuis eimitar aqueilho que nun somos? Porque será que nas relaçones que tenemos culs outros mos ampenhamos i lhuitamos de spada afilada pula nuossa berdade ou pula nuossa mintira?

-Haberá solo ua berdade?

Até quando na nuossa cabeça ye legítimo çconhecer que hai problemas, i nun antendermos que para ls resolber hai que ls sponer, que ye preciso falar deilhes!

Será que l mais de las bezes antendemos porquei hai bioléncia, quier seia física ou eimocional!

 An casa, cul matrimonho ou culs filhos, ne l trabalho, nas scuolas, nos lares d’acolhimiento, nas rues, nas anstituiçones! I que l mais de las bezes nós cumo personas bemos i quedamos andrentes, cumo se nada fusse i até biramos la cara!

Que pensaran ls biolentados, séias homes ou mulheres, filhos ou filhas, nuobos ou bielhos, probes ou ricos quando a la par de la bioléncia béen la andrença de ls outros, cumo quien diç de la nuossa!

Hai quien diga i afinque ls pies que ne ls dies d’hoije la bioléncia ye maior que dantes, que medrou nas redadeiras geraçones, será? 

Ou será que hoije la zmascaramos mais ( i inda bien ) stá menos amouchada, ye mais divulgada que era?

Ua berdade me parece bien cierta, mesmo que eilha seia eigual, nun tenie rezon de ser, la bioléncia subre ls outros, subre ls mais fracos nun ten rezon d’eisistir, nós cumo sociadade medremos, na cultura, ne ls modos de ber l nuosso par, l nino, l bielho, l mais neçassitado, l de fuora, medremos ne ls balores morales.

REZONES PARA QUERER BIBIER

ESTE YE L MIU NIETO

1º

L TIAGO ANDRE

1

Ampeço assi mesmo

Para bos dezier cumo ye

Un rapaç bien a las dreitas

L miu nieto TIAGO ANDRÉ

2

Sien saberen nada de la bida

I quando naide l spraba

Fazírun l TIAGO ANDRÉ

Pensando que l mundo s´acababa

3

Mas las cousas son assi

I l mundo nun s´acabou

I anton l TIAGO ANDRÉ

Por este mundo quedou

4

Por este mundo quedou

Para anfrentar las cousas duras

Que transformou la mie bida

Na marabilhas mais puras

5

Nas marabilhas mais puras

Que me trasformórun nun abó

Para que quando you fuor bielho

Nun tener miedo de quedar solo

6

Puis l miu nieto TIAGO ANDRÉ

Que nunca fui muito churon

Fui la mie grande alegrie

I la fuorça de l miu coraçon

7

La fuorça de l miu coraçon

Que outras fuorças fui arranjar

Para cuidar de l TIAGO ANDRÉ

Anquanto la mai iba a trabalhar

8

Anquanto la mai iba a trabalhar

Que la bida ten que assi ser

I depuis l TIAGO ANDRÉ

Tamien tenie que quemer

9

Tamien tenie que quemer

Na altura era mais l mamar

Mesmo assi al TIAGO ANDRÉ

Nada l puodie faltar

10

Nada l puodie faltar

Talbeç por ser l purmeiro

I depuis l TIAGO ANDRÉ

Era un rapaç bien purreiro

11

Ambora me fazisse mais bielho

Mais responsabilidades habie que tener

Para ber medrar l TIAGO ANDRÉ

Era ua buona rezon para biber

12

Ye ua buona rezon para biber

Acompanhando als outros niietos

Mesmo que la nuossa bida

Mos reserbe alguns apertos

13

Mos reserve alguns apertos

Que la bida nun dá punto sien nuolo

I depuis l miu TIAGO ANDRÉ

Fui l purmeiro que me fizo abó

14

Mais tarde outrosbenirun

A saltar ne l miu terreiro

Mas l TIAGO ANDRÉ

De ls nietos ye l purmeiro

15

De ls nietos ye l purmeiro

Para me dar algun agrado

I fizo de mie un abó

Muito feliç i babado

16

Muito feliç i babado

Cumo nun puodie deixar de ser

Que me dou ua buona rezon

Para you continar a biber

17

Para you continar a biber

Cun ourgulho i cun fé

I cun outros compremissos

Para ajudar l TIAGO ANDRÉ

18

Para ajudar l TIAGO ANDRÉ

Na grande carreira de la bida

Que yá ye ua buona rezon

Pa la biber dibertida

José António Esteves