Sou capaç de ber loinge

 

Spertei  a las seis de la manhana. Abri la jinela para oubir ls paixaros a cantar, sien sequiera dáren seinhas  de stremunhados.   Fui caminando até l canhiço i un nubrineiro querie tirá-me las bistas, mas, nesta manhana fresquita, de cielo temado por un cortinado quelor de cinza, sou capaç de ber loinge.

Alhá abaixo stá la coube cun l nial de pintaxirgo, tan tapadico cun fuolhas berdes i grandes de la outra beç que acá stube, agora spaixaracadas yá nun son capazes de fazer de guarda chuba als dous paixaricos bien criados, a acuquelhar l nial. Tamien pouco amportará. Ténen ua gabardina buona subre la piel.

Por sfregantes, aquel nialico cheno i acuquelhado fizo-me benir a la lhembráncia l miu cuolho, bien menos ancho que ye agora, acuquelhado cun ls mius dous ninos…

Se tebisses ua gueiola, diç-me onte a la tarde Alcides… Nó Alcides!, anterrumpi.

 Nun quiero páixaros an gueiolas… Nien paixaros, nien mulhieres…